காட்மாண்டு:
இந்தியாவில் கடந்த 2016-ஆம் ஆண்டு பணமதிப்பிழப்பு நடவடிக்கை மேற்கொள்ளப்பட்டதைத் தொடர்ந்து, நேபாள அரசு ரூ.100-க்கு அதிகமான உயர் மதிப்புடைய இந்திய ரூபாய் நோட்டுகளைத் தனது நாட்டில் பயன்படுத்தத் தடை விதித்திருந்தது. இதனால் எல்லைப் பகுதி வர்த்தகர்களும், நேபாளத்திற்குச் செல்லும் இந்தியச் சுற்றுலாப் பயணிகளும் பெருமளவில் அவதிப்பட்டு வந்தனர்.
இந்நிலையில், நேபாள மத்திய வங்கி (NRB) வெளியிட்டுள்ள அதிகாரப்பூர்வ அறிவிப்பின் முக்கிய விவரங்கள்:
- புதிய தளர்வுகள்:இந்திய மற்றும் நேபாள குடிமக்கள் இருவரும், இந்தியாவில் 2016 நவம்பர் 9-க்குப் பிறகு வெளியிடப்பட்ட ரூ.200 மற்றும் ரூ.500 மதிப்புள்ள புதிய இந்திய ரூபாய் நோட்டுகளை நபர் ஒருவருக்கு அதிகபட்சமாக ரூ.25,000 வரை கையில் எடுத்துச் செல்லவும், பயன்படுத்தவும் அனுமதி அளிக்கப்பட்டுள்ளது.
- பழைய நோட்டுகளுக்குத் தடை தொடரும்:2016 பணமதிப்பிழப்பு நடவடிக்கைக்கு முன் புழக்கத்தில் இருந்த பழைய ரூ.500 மற்றும் ரூ.1000 நோட்டுகளுக்கான தடை தொடர்ந்து அமலில் இருக்கும் எனத் தெளிவுபடுத்தப்பட்டுள்ளது.
- எல்லை நிபந்தனைகள்:இந்தியாவிலிருந்து நேபாளத்திற்கு நேரடியாகச் செல்லும் போதும் அல்லது நேபாளத்திலிருந்து இந்தியாவிற்கு வரும்போதும் மட்டுமே இந்த இந்திய ரூபாய்களைக் கொண்டு செல்ல அனுமதி உண்டு. மூன்றாம் நாட்டிலிருந்து நேபாளத்திற்குள் இந்திய ரூபாய்களைக் கொண்டுவரக் கூடாது என நேபாள மத்திய வங்கியின் செய்தித் தொடர்பாளர் தெளிவுபடுத்தியுள்ளார்.
பயன்கள்:
இந்தியாவில் இருந்து நேபாளத்திற்குச் செல்லும் சுற்றுலாப் பயணிகள், ஆன்மிகப் பயணம் மேற்கொள்ளும் பக்தர்கள் மற்றும் எல்லை ஓரங்களில் சிறு வணிகம் செய்யும் இருநாட்டு வர்த்தகர்களுக்கும் இந்த புதிய முடிவு மிகப்பெரிய நிவாரணமாக அமைந்துள்ளது.
