காரகஸ்: வெனிசுலா நாட்டின் வடக்குக் கடற்கரைப் பகுதியில் அடுத்தடுத்து ஏற்பட்ட சக்திவாய்ந்த இரட்டை நிலநடுக்கங்களைத் தொடர்ந்து, தற்போது மீண்டும் ஒரு புதிய நிலநடுக்கம் ஏற்பட்டுள்ளது. இதனால் ஒட்டுமொத்தப் பேரழிவிலும் உயிரிழந்தவர்களின் எண்ணிக்கை 920 ஆக அதிரடியாக உயர்ந்துள்ளது.
கடந்த புதன்கிழமை வெனிசுலாவில் ரிக்டர் அளவில் முறையே 7.2 மற்றும் 7.5 ஆகப் பதிவான இரண்டு சக்திவாய்ந்த நிலநடுக்கங்கள் கடுமையான சேதத்தை ஏற்படுத்தின. இந்த அதிர்ச்சியில் இருந்து மீள்வதற்குள், நேற்று வெள்ளிக்கிழமை மதியம் தலைநகர் கராகஸ் மற்றும் மரகாய் ஆகிய நகரங்களில் ரிக்டர் அளவில் 4.9 ஆகப் பதிவான மற்றொரு புதிய நிலநடுக்கம் ஏற்பட்டுள்ளது. இதனால் ஏற்கனவே அச்சத்தில் உறைந்திருந்த பொதுமக்கள் அலறியடித்தபடி வீதிகளில் தஞ்சம் புகுந்தனர்.
அந்நாட்டின் தேசிய சட்டமன்றத் தலைவர் ஜார்ஜ் ரோட்ரிக்ஸ் வெளியிட்டுள்ள அதிகாரப்பூர்வ அறிவிப்பின்படி, நிலநடுக்கப் பேரிடரால் பலியானோர் எண்ணிக்கை 920 ஆக எகிறியுள்ளது. மேலும், 3,360 க்கும் மேற்பட்டோர் படுகாயமடைந்துள்ளனர். மிக மோசமாகப் பாதிக்கப்பட்ட லா குவைரா பிராந்தியம் முழுமையாக ராணுவக் கட்டுப்பாட்டிற்குள் கொண்டுவரப்பட்டு, அவசரநிலை பிரகடனப்படுத்தப்பட்டுள்ளது.
தற்போது வரை சுமார் 50,000-க்கும் மேற்பட்டோர் காணாமல் போயுள்ளதாக ஐ.நா.வின் மனிதாபிமான உதவி அமைப்பு (OCHA) கவலை தெரிவித்துள்ளது. இடிபாடுகளுக்குள் இன்னும் நூற்றுக்கணக்கானவர்கள் சிக்கியிருக்கலாம் என்பதால் பலி எண்ணிக்கை மேலும் அதிகரிக்கக்கூடும் என அஞ்சப்படுகிறது.
தகவல் தொடர்பு மற்றும் மின்சார சேவைகள் முற்றிலும் துண்டிக்கப்பட்டுள்ளதால் மீட்புப் பணிகளில் தொய்வு ஏற்பட்டுள்ளது. எனினும், அமெரிக்கா, மெக்சிகோ, கொலம்பியா மற்றும் சுவிட்சர்லாந்து உள்ளிட்ட 17 நாடுகளைச் சேர்ந்த சர்வதேச நிபுணத்துவ மீட்புக் குழுவினர் மோப்ப நாய்களுடன் வெனிசுலா விரைந்து தீவிரத் தேடுதல் வேட்டையில் ஈடுபட்டு வருகின்றனர்.
