சென்னை: மேகதாது அணை விவகாரத்தை நாம் மிகவும் கவனமாகக் கையாள வேண்டும்; இல்லையென்றால் மத்திய நீர்வளத்துறை அமைக்கும் டிராப்பில் (Trap) நாம் சிக்கிக் கொள்ள நேரிடும் என்று திமுக மூத்த தலைவர் தங்கம் தென்னரசு எச்சரித்துள்ளார்.
சட்டப்பேரவையில் மேகதாது அணைக்கு எதிராகக் கொண்டுவரப்பட்ட தீர்மானத்தில் மேற்கொள்ளப்பட்ட திருத்தங்கள் குறித்துச் செய்தியாளர்களைச் சந்தித்துப் பேசிய அவர், இது தொடர்பாகப் பல்வேறு முக்கிய விவரங்களைப் பகிர்ந்துகொண்டார்.
சட்ட வல்லுநர்களின் முக்கிய ஆலோசனை
செய்தியாளர்கள் சந்திப்பில் தங்கம் தென்னரசு பேசியதாவது: “மேகதாது விவகாரத்தில் அடுத்தகட்டமாக என்ன செய்யலாம் என்பது குறித்து நாட்டின் முன்னணி மற்றும் உச்ச நீதிமன்ற மூத்த வழக்கறிஞர்களுடன் விரிவான ஆலோசனைகள் மேற்கொள்ளப்பட்டன. தற்போதைய சூழலில், புதிய நடுவர் மன்றம் (Arbitration Tribunal) ஒன்றை அமைப்பதே தமிழ்நாட்டிற்குச் சரியான தீர்வாக இருக்கும் என்று அவர்கள் ஆலோசனை வழங்கியுள்ளனர்.
இந்த ஆலோசனையின் அடிப்படையிலேயே, மாநிலங்களுக்கு இடையிலான நதிநீர் தாவா சட்டம்-1956, பிரிவு 4-ன் கீழ் புதிய நடுவர் மன்றத்தை அமைக்க வேண்டும் என்று கடந்த மார்ச் 4, 2026 அன்று தமிழ்நாடு அரசின் சார்பில் மத்திய அரசுக்குக் கடிதம் மூலம் அதிகாரப்பூர்வமாகக் கோரிக்கை வைக்கப்பட்டது.”
உச்ச நீதிமன்றத் தீர்ப்பு பாதிக்கப்படாது
“புதிதாக நடுவர் மன்றம் அமைப்பது என்பது ஏற்கனவே கடந்த 2018-ஆம் ஆண்டில் உச்ச நீதிமன்றம் வழங்கிய காவிரி இறுதித் தீர்ப்பை எந்த வகையிலும் பாதிக்காது. கர்நாடகா முன்பு அணை கட்ட முயற்சித்த போதெல்லாம் தமிழ்நாடு அரசு அதைச் சட்டப்பூர்வமாகத் தடுத்து நிறுத்தியுள்ளது. குடிநீர் என்ற போர்வையில் அவர்கள் நடத்தும் புதிய முயற்சிக்கு முற்றுப்புள்ளி வைக்கவே இந்தத் தனி நடுவர் மன்றம் கோரப்படுகிறது.”
விவசாயிகள் நலனே முக்கியம்
“திமுக ஆட்சிக் காலத்தில் எடுக்கப்பட்ட முடிவாக இது இருந்தாலும், இது ஒட்டுமொத்தத் தமிழ்நாட்டு விவசாயிகளின் நலனைக் காப்பதற்காக எடுக்கப்பட்ட ஒரு மாநில அரசின் முடிவாகும். அரசியல் கருத்து வேறுபாடுகளைக் கடந்து, இந்தத் தீர்மானத்தின் அவசியத்தை உணர்ந்து முதலமைச்சர் இத்தீர்மானத்தை நிறைவேற்றியுள்ளார்.
சட்டப்பேரவையில் தீர்மானம் கொண்டுவரப்பட்டு ஒருமனதாக நிறைவேற்றப்பட்ட சூழலில், இதில் மீண்டும் விவாதங்களை ஏற்படுத்துவது நமக்குள்ளேயே பிளவு இருப்பதாகக் காட்டும் அரசியல் சூழலை உருவாக்கிவிடும். எனவே, தமிழகத்தின் நதிநீர் உரிமைகளைக் காக்க அனைத்து அரசியல் கட்சிகளும் ஓரணியில் திரண்டு இதற்கு ஒருமனதாக ஆதரவு அளிக்க வேண்டும்” என்று தங்கம் தென்னரசு கோரிக்கை விடுத்துள்ளார்.
