சென்னை: தமிழக சட்டப்பேரவைக் கூட்டத்தொடரில் மன்னார்குடி தொகுதி எம்.எல்.ஏ காமராஜ் நகைச்சுவையாகப் பேசிய பேச்சு, அதுவரை அவையில் எவ்வித முகபாவமும் காட்டாமல் தீவிரமாக அமர்ந்திருந்த முதலமைச்சர் சி. ஜோசப் விஜயின் முகத்தில் பெரிய சிரிப்பை வரவழைத்துள்ளது.
சட்டப்பேரவை நிகழ்வுகளின் போது, புதிய சபாநாயகர் மற்றும் துணை சபாநாயகருக்கு வாழ்த்துத் தெரிவிக்கும் தீர்மானத்தின் மீதான விவாதம் நடைபெற்றது. அப்போது மன்னார்குடி எம்.எல்.ஏ காமராஜ் முதலமைச்சருக்கு வாழ்த்துத் தெரிவிக்க தொடர்ந்து முயன்று வந்தார்.
பேசுவதற்கு வாய்ப்பு அளிக்கப்பட்ட போது எம்.எல்.ஏ காமராஜ் நகைச்சுவையுடன் தனது உரையைத் தொடங்கினார்:
“அப்பாடா… ஒருவழியாக 8-வது முறையாக எழுந்து நின்ற பிறகுதான், இப்போது முதலமைச்சருக்கு வாழ்த்துச் சொல்ல எனக்கு வாய்ப்புக் கிடைத்திருக்கிறது. கடந்த 7 முறை நான் எழுந்தபோதும் எனக்கு வாய்ப்பு மறுக்கப்பட்டது. ஆனால், விடாமல் முயன்று இந்த 8-வது வாய்ப்பில் முதலமைச்சரை வாழ்த்துவதில் பெருமகிழ்ச்சி அடைகிறேன்.”
எம்.எல்.ஏ காமராஜின் இந்த சுவாரசியமான பேச்சைக் கேட்டதும், அவையில் இருந்த உறுப்பினர்கள் அனைவரும் பலத்த சிரிப்பொலி எழுப்பினர். தொடர்ந்து அமைதியாக அமர்ந்திருந்த முதலமைச்சர் விஜயும் இதைக் கேட்டுத் தன் முகத்தில் அலாதியான சிரிப்பை வெளிப்படுத்தினார்.
இதற்கிடையே குறுக்கிட்ட சபாநாயகர் ஜே.சி.டி. பிரபாகரன், “பேசுவதற்காக நீங்கள் 8 முறை எழுந்து அமர்ந்தது உங்களுக்கு ஒரு நல்ல உடற்பயிற்சிதான்” என்று கிண்டலாகக் குறிப்பிட, அவையே மீண்டும் கலகலப்பானது.
தொடர்ந்து பேசிய எம்.எல்.ஏ காமராஜ், தற்போதைய தமிழக வெற்றிக் கழக (தவெக) அரசின் செயல்பாடுகளையும், முதலமைச்சர் விஜய் பொறுப்பேற்றதும் கையெழுத்திட்ட மக்கள் நலன் சார்ந்த முக்கியக் கோப்புகளையும் வெகுவாகப் பாராட்டினார். மேலும், தனது மன்னார்குடி தொகுதி சார்ந்த முக்கியக் கோரிக்கைகளையும் அவர் பேரவையின் முன்வைத்தார் என்பது குறிப்பிடத்தக்கது.
