திருப்பூர்: பொதுமக்களுக்கு விநியோகம் செய்ய வேண்டிய அரசு ஆவணங்கள், ஏடிஎம் கார்டுகள் உள்ளிட்ட முக்கியத் தபால்களை விநியோகிக்காமல், கடந்த 4 ஆண்டுகளாகத் தனது வீட்டில் மூட்டை மூட்டையாகப் பதுக்கி வைத்திருந்த தபால்காரர் அதிரடியாகப் பணியிடை நீக்கம் (Suspend) செய்யப்பட்டுள்ளார். இச்சம்பவம் திருப்பூர் மாவட்டம் காங்கேயம் பகுதியில் பெரும் அதிர்ச்சியையும் பரபரப்பையும் ஏற்படுத்தியுள்ளது.
திருப்பூர் கோட்டத்திற்கு உட்பட்ட வெள்ளக்கோவில் தபால் நிலையத்தில் கடந்த 15 ஆண்டுகளாகத் தபால்காரராகப் பணியாற்றி வருபவர் செந்தில்குமார் (45). இவர் காங்கேயம் கோவை ரோடு பகுதியில் வசித்து வருகிறார்.
மாட்டிக்கொண்டது எப்படி?
செந்தில்குமாரின் வீட்டின் அருகே தெருநாய்கள் தொல்லை அதிகமாக இருப்பதாகப் போலீசாருக்குப் புகார்கள் வந்தன. இதுகுறித்து விசாரிப்பதற்காகப் போலீசார் அவரது வீட்டிற்குச் சென்றபோது, அங்கு வீட்டின் உள்ளே ஏராளமான தபால்கள் மூட்டை மூட்டையாகக் குவிந்து கிடப்பதைக் கண்டு அதிர்ச்சியடைந்தனர்.
இதுகுறித்து உடனடியாகத் தபால் துறை உயர் அதிகாரிகளுக்குத் தகவல் தெரிவிக்கப்பட்டது. சம்பவ இடத்திற்கு விரைந்து வந்த தபால் துறை அதிகாரிகள், செந்தில்குமார் வீட்டில் பதுக்கி வைக்கப்பட்டிருந்த 7 மூட்டை தபால்களை அதிரடியாகப் பறிமுதல் செய்து, ஆட்டோ மூலம் தபால் நிலையத்திற்கு எடுத்துச் சென்றனர்.
4 ஆண்டு ஆவணங்கள் பதுக்கல்:
அதிகாரிகள் நடத்திய முதற்கட்ட சோதனையில், பறிமுதல் செய்யப்பட்ட மூட்டைகளில் கடந்த 4 ஆண்டுகளுக்கும் மேலாக வெள்ளக்கோவில் பகுதி மக்களுக்கு வந்த முக்கியமான கடிதங்கள், வங்கி ஏடிஎம் கார்டுகள், பான் கார்டுகள், பாஸ்போர்ட், நீதிமன்ற நோட்டீஸ்கள் மற்றும் அரசு வேலைவாய்ப்பு ஆணைகள் உள்ளிட்ட பல முக்கிய ஆவணங்கள் இருப்பது கண்டறியப்பட்டது.
பக்கவாத நோயால் பாதிக்கப்பட்டிருந்த செந்தில்குமார், கடந்த சில மாதங்களாகத் தபால்களை விநியோகிக்க முடியாமல் வீட்டில் பதுக்கியதாகக் கூறப்பட்டாலும், 4 ஆண்டுகால தபால்கள் மீட்கப்பட்டுள்ளதால் இதில் நீண்டநாட்களாக அலட்சியம் காட்டியிருப்பது வெளிச்சத்திற்கு வந்துள்ளது.
உயர் அதிகாரிகள் அதிரடி நடவடிக்கை:
பொதுமக்களின் முக்கிய ஆவணங்களை விநியோகிக்காமல் நம்பிக்கை துரோகம் செய்த குற்றத்திற்காக, தபால்காரர் செந்தில்குமாரை உடனடியாகப் பணியிடை நீக்கம் (Suspend) செய்து திருப்பூர் கோட்ட தலைமை தபால் கண்காணிப்பாளர் பட்டாபிராமன் உத்தரவிட்டுள்ளார்.
மேலும், அவர் மீது துறைரீதியான விசாரணைக்கு உத்தரவிடப்பட்டுள்ளதுடன், மீட்கப்பட்ட 7 மூட்டை தபால்களும் தரம் பிரிக்கப்பட்டு, இன்னும் ஓரிரு நாட்களில் உரிய பொதுமக்களிடம் பாதுகாப்பாக ஒப்படைக்கப்படும் என்றும் தபால்துறை அதிகாரிகள் தெரிவித்துள்ளனர்.
