ஆக்லாந்து (நியூசிலாந்து): சர்வதேச ஹாக்கி கூட்டமைப்பு (FIH) நடத்தும் மகளிருக்கான நேஷன்ஸ் கோப்பை ஹாக்கி தொடர் நியூசிலாந்தின் ஆக்லாந்து நகரில் விறுவிறுப்பாக நடைபெற்று வருகிறது. இதன் முதலாவது அரையிறுதி ஆட்டத்தில் சிலி அணியை 6-0 என்ற கோல் கணக்கில் துவம்சம் செய்து, இந்திய மகளிர் அணி இறுதிப்போட்டிக்கு கம்பீரமாக முன்னேறியுள்ளது.
ஆட்டம் தொடங்கியது முதலே இந்திய வீராங்கனைகள் தங்களது அதிரடியான ஆட்டத்தால் சிலி அணியை திணறடித்தனர். போட்டியின் முதல் கால் பகுதியிலேயே (First Quarter) இந்திய அணி முழு ஆதிக்கத்தை செலுத்தியது.
ஆட்டத்தின் 6-வது நிமிடத்தில் இந்தியாவிற்கு கிடைத்த பெனால்டி கார்னர் வாய்ப்பை நவ்நீத் கவுர் கோலாக மாற்றினார். தொடர்ந்து 13-வது நிமிடத்தில் அவர் மீண்டும் ஒரு ஃபீல்ட் கோல் அடித்து அசத்தினார். அடுத்த நிமிடமே (14-வது நிமிடம்) நட்சத்திர வீராங்கனை தீபிகா மற்றொரு பெனால்டி கார்னர் வாய்ப்பை கோலாக மாற்ற, முதல் கால் பகுதியிலேயே இந்தியா 3-0 என வலுவான முன்னிலை பெற்றது.
இரண்டாவது கால் பகுதியிலும் இந்தியாவின் அதிரடி தொடர்ந்தது. 18-வது நிமிடத்தில் தீபிகா தனது இரண்டாவது கோலை பதிவு செய்தார். இதனால் ஆட்டத்தின் முதல் பாதியில் இந்திய அணி 4-0 என முன்னிலையில் இருந்தது.
பின் பாதியில் மீண்டெழ முயன்ற சிலி அணியின் முயற்சிகளை இந்திய தடுப்பாட்ட வீராங்கனைகளும், கோல்கீப்பர் சவிதா புனியாவும் முறியடித்தனர். தொடர்ந்து 32-வது நிமிடத்தில் நேஹாவும், 39-வது நிமிடத்தில் ருதுஜாவும் தலா ஒரு கோல் அடிக்க, ஆட்டநேர முடிவில் இந்திய அணி 6-0 என்ற கணக்கில் அபார வெற்றி பெற்றது.
சிறந்த ஆட்டத்தை வெளிப்படுத்திய இந்திய அணியின் கேப்டன் சலிமா டெட்டே ஆட்டநாயகியாக (Player of the Match) தேர்வு செய்யப்பட்டார். இந்தத் தொடரில் விளையாடிய அனைத்துப் போட்டிகளிலும் தோல்வியே சந்திக்காமல் இந்திய அணி இறுதிப்போட்டிக்கு தகுதி பெற்றுள்ளது குறிப்பிடத்தக்கது.
நாளை (ஜூன் 21) நடைபெறவிருக்கும் இறுதிப்போட்டியில் இந்திய அணி, நியூசிலாந்து – அமெரிக்கா அணிகளுக்கு இடையேயான இரண்டாவது அரையிறுதியில் வெற்றி பெறும் அணியை எதிர்கொள்ளும். இந்த இறுதிப்போட்டியில் வெற்றி பெற்று கோப்பையை கைப்பற்றினால், இந்திய அணி அடுத்த சீசனுக்கான (2026-27) ‘எப்ஐஹெச் புரோ லீக்’ தொடருக்கு தகுதி பெறும் என்பது குறிப்பிடத்தக்கது.
