சென்னை: தமிழகத்தில் தவெக ஆட்சி பொறுப்பேற்று 54 நாட்கள் கடந்த நிலையில், மாநிலத்தின் சட்டம் – ஒழுங்கு கடுமையாகச் சீரழிந்துள்ளதாகக் குற்றம் சாட்டி, தமிழக பாஜக தலைவர் நயினார் நாகேந்திரன் இன்று ஆளுநர் ஆர்.என். ரவியை நேரில் சந்தித்து மனு அளித்தார்.
ஆளுநரிடம் நயினார் நாகேந்திரன் முன்வைத்த முக்கியக் குற்றச்சாட்டுகள்:
- குற்றச் சம்பவங்கள் அதிகரிப்பு: ஆட்சி பொறுப்பேற்ற கடந்த 54 நாட்களில் மட்டும் 151 பாலியல் வன்கொடுமைகள், 85-க்கும் மேற்பட்ட படுகொலைகள் மற்றும் 80-க்கும் மேற்பட்ட போதைப்பொருள் கடத்தல் சம்பவங்கள் நிகழ்ந்துள்ளன. முந்தைய திமுக ஆட்சியை விட தவெக ஆட்சியில் சட்டம் – ஒழுங்கு எந்த வகையிலும் முன்னேறவில்லை என்று அவர் குற்றம் சாட்டியுள்ளார்.
- அமைச்சர்கள் மீது ஊழல் புகார்: அரசு வழக்கறிஞர்களை நியமிக்க அமைச்சர் நிர்மல் குமார் ரூ. 5 லட்சம் முதல் ரூ. 50 லட்சம் வரை லஞ்சம் கேட்பதாகப் புகார் எழுந்துள்ளதைச் சுட்டிக்காட்டிய நயினார் நாகேந்திரன், இது குறித்து விசாரணை நடத்த வலியுறுத்தினார்.
- நிர்வாக விதிமீறல்: சமீபத்தில் நடைபெற்ற தவெக அமைச்சரவைக் கூட்டத்தில், அமைச்சரவை சாராத விஷ்ணு ரெட்டி மற்றும் ஜான் ஆரோக்கியசாமி ஆகிய தனிநபர்கள் கலந்துகொண்டது ‘இரகசிய காப்புப் பிரமாணத்திற்கு’ (Oath of Secrecy) எதிரானது என்று அவர் புகார் அளித்துள்ளார்.
- அமைச்சர் விஸ்வநாதன் செயல்: உயர்கல்வித் துறை அமைச்சர் பெ. விஸ்வநாதன் குழந்தைகளிடம் நடந்துகொண்ட விதம் நாகரிகமற்றது என்றும், இது குறித்து உரிய நடவடிக்கை எடுக்க வேண்டும் என்றும் கோரியுள்ளார்.
செய்தியாளர் சந்திப்பில் நயினார் நாகேந்திரன்: ஆளுநர் மாளிகை வெளியே செய்தியாளர்களிடம் பேசிய அவர், “எல்லாவற்றிற்கும் வெள்ளை அறிக்கை வெளியிடும் தவெக அரசு, சட்டம் – ஒழுங்கு குறித்த நிலவரத்திற்கு ஏன் வெள்ளை அறிக்கை வெளியிடவில்லை? மற்ற கட்சிகளின் எம்எல்ஏக்களைத் தங்கள் பக்கம் இழுக்கும் குதிரை பேரத்தில் ஈடுபடுவதிலேயே தவெக அரசு கவனம் செலுத்துகிறது,” எனச் சாடினார்.
எதிர்ப்புகள்: இதனிடையே, பாஜக தலைவர் நயினார் நாகேந்திரனின் இந்த புகார்களை காங்கிரஸ் எம்பி மாணிக்கம் தாகூர் வன்மையாகக் கண்டித்துள்ளார். “உயர்கல்வித் துறை அமைச்சர் குழந்தைகளுக்கு யோகா மற்றும் விளையாட்டுப் போட்டிகளை நடத்தியதை விவாதம் ஆக்குவது ஆர்.எஸ்.எஸ். வெறுப்பரசியலின் வெளிப்பாடு” என்று அவர் விமர்சித்துள்ளார்.
தவெக ஆட்சி அமைந்த குறுகிய காலத்திலேயே, பாஜகவின் இந்த அதிரடிப் புகார் அரசியல் களத்தில் பெரும் பரபரப்பை ஏற்படுத்தியுள்ளது.
