மும்பை: பள்ளி மாணவர்களின் உடல்நலனைக் கருத்தில் கொண்டு, மகாராஷ்டிர மாநிலம் முழுவதும் உள்ள பள்ளிகளைச் சுற்றியுள்ள பகுதிகளில் புகழ்பெற்ற ‘ஸ்டிங்’ (Sting) உள்ளிட்ட அதிக கஃபைன் (High-Caffeine) கொண்ட எனர்ஜி பானங்களை விற்பனை செய்ய மகாராஷ்டிர அரசு அதிரடியாகத் தடை விதித்துள்ளது.
சட்டப்பேரவையில் எழுந்த விவாதம்:
மகாராஷ்டிர மாநிலச் சட்டப்பேரவையின் மழைக்காலக் கூட்டத்தொடரில், பா.ஜ.க சட்டமன்ற உறுப்பினர் விக்ரம் பச்சுதே பள்ளி மாணவர்களிடையே ‘ஸ்டிங்’ போன்ற எனர்ஜி பானங்களின் நுகர்வு மற்றும் அதன் அடிமைத்தனம் குறித்துப் பேசினார்.
“இந்த பானங்களின் பாட்டில்களிலேயே ‘குழந்தைகள் மற்றும் கர்பிணிப் பெண்களுக்கு உகந்தது அல்ல’ என்று எச்சரிக்கை விடுக்கப்பட்டுள்ளது. இருந்தபோதிலும், இவை பள்ளிகளுக்கு வெளியேயே தாராளமாகக் கிடைக்கின்றன. குழந்தைகளின் ஆரோக்கிய சிதைவைக் கணக்கிட்டால், இது மதுவை விடவும் ஆபத்தானது” என்று அவர் உடனடியாகத் தடை விதிக்கக் கோரினார்.
500 மீட்டர் சுற்றளவிற்குத் தடை:
இதற்குப் பதிலளித்துப் பேசிய மகாராஷ்டிர மாநில உணவு மற்றும் மருந்து நிர்வாகத் துறை (FDA) அமைச்சர் நர்ஹரி சிர்வால் பின்வரும் முக்கிய அறிவிப்புகளை வெளியிட்டார்:
- கடுமையான தடைவளையம்: மாநிலம் முழுவதும் உள்ள அனைத்துப் பள்ளிகளின் வளாகங்களில் இருந்து 500 மீட்டர் சுற்றளவிற்குள் ‘ஸ்டிங்’ எனர்ஜி பானங்கள் மற்றும் இதர போதை பொருட்கள் விற்பனை செய்யக் கடுமையான தடை விதிக்கப்படுகிறது.
- உடனடி நடவடிக்கை: இந்த 500 மீட்டர் தடை வளைய மீறல்களைக் கண்காணிக்கத் தற்பொழுது மாநில உணவு மற்றும் மருந்து நிர்வாகத் துறைக்கு (FDA) உத்தரவிடப்பட்டுள்ளது. விதிகளை மீறி விற்பனை செய்யும் கடைகள் மீது கடுமையான சட்ட நடவடிக்கை பாயும்.
- விழிப்புணர்வு பிரசாரம்: எனர்ஜி பானங்களால் ஏற்படும் உடல்நலக் கேடுகள், சர்க்கரை மற்றும் கஃபைன் அளவுகள் குறித்துப் பள்ளிகள் தோறும் மாணவர்களிடையே சிறப்பு விழிப்புணர்வு திட்டங்களை நடத்தவும் கல்வித்துறைக்கு அறிவுறுத்தப்பட்டுள்ளது.
சமீபத்தில் இந்திய உணவுப் பாதுகாப்பு மற்றும் தர நிர்ணய ஆணையம் (FSSAI) தவறான விளம்பரக் கோரிக்கைகளுக்காக ஸ்டிங், ரெட் புல் உள்ளிட்ட 6 முன்னணி எனர்ஜி பான நிறுவனங்களுக்கு நோட்டீஸ் அனுப்பியிருந்த நிலையில், மகாராஷ்டிர அரசின் இந்த அதிரடி உத்தரவு நாடு முழுவதும் பெற்றோர்கள் மற்றும் கல்வி ஆர்வலர்கள் மத்தியில் பெரும் வரவேற்பைப் பெற்றுள்ளது.
