சென்னை: சென்னை துறைமுக ஆணையத்தின் (Chennai Port Authority) புதிய தலைவராக மூத்த இந்திய ஆட்சிப் பணி (IAS) அதிகாரி குர்வே சச்சின் சரத்சந்திரா இன்று முறைப்படி பொறுப்பேற்றுக் கொண்டார். துறைமுகத்தின் உள்கட்டமைப்பு மற்றும் வர்த்தக மேம்பாட்டை அடுத்தகட்டத்திற்கு எடுத்துச் செல்லும் நோக்கில் இந்த நியமனம் அமைந்துள்ளது.
மத்திய அமைச்சரவையின் நியமனக் குழு (ACC) இவரை 5 ஆண்டு காலத்திற்குச் சென்னை துறைமுக ஆணையத்தின் தலைவராக நியமித்து சமீபத்தில் உத்தரவிட்டிருந்தது.
அதிகாரியின் பின்னணி விவரம்: குர்வே சச்சின் சரத்சந்திரா, புகழ்பெற்ற விஸ்வேஸ்வராயா தேசிய தொழில்நுட்ப நிறுவனத்தில் (VNIT) எந்திரப் பொறியியல் (Mechanical Engineering) பட்டம் பெற்றவர் ஆவார். அதன் பிறகு, 2003-ஆம் ஆண்டு உத்தரகாண்ட் கேடரைச் சேர்ந்த ஐ.ஏ.எஸ் அதிகாரியாகத் தனது நிர்வாகப் பணியைத் தொடங்கினார்.
கடந்த 20 ஆண்டுகளுக்கும் மேலான தனது பணிக்காலத்தில், பல்வேறு அரசுத் துறைகளில் மாவட்ட ஆட்சியர் உள்ளிட்ட பல முக்கியப் பொறுப்புகளை மிகச் சிறப்பாகக் கையாண்டு பழுத்த நிர்வாக அனுபவம் பெற்றவர் என்பது குறிப்பிடத்தக்கது.
துறைமுகத்தின் அடுத்தகட்ட இலக்கு: சென்னை துறைமுக ஆணையத்தின் தலைவராகப் பொறுப்பேற்றுக் கொண்ட குர்வே சச்சின் சரத்சந்திராவுக்குத் துறைமுகத்தின் உயர் அதிகாரிகள் மற்றும் ஊழியர்கள் தங்களது வாழ்த்துகளைத் தெரிவித்தனர்.
பொறுப்பேற்ற பின் பேசிய அவர், “சென்னை துறைமுகத்தின் சரக்குக் கையாளுதல் திறனை அதிகரிப்பது, உள்கட்டமைப்பு வசதிகளை மேம்படுத்துவது மற்றும் கடல்சார் வர்த்தகத்தை மேலும் வலுப்படுத்துவது ஆகியவற்றுக்கு முன்னுரிமை அளித்துச் செயல்பட உள்ளதாகத்” தெரிவித்தார். இவரின் வருகை சென்னை துறைமுகத்தின் வளர்ச்சிக்கு மேலும் வேகம் சேர்க்கும் என எதிர்பார்க்கப்படுகிறது.
