சென்னை: கோலிவுட்டின் முன்னணி நட்சத்திரங்களில் ஒருவரான நடிகர் கார்த்தி, தனது அடுத்தடுத்த திரைப்படங்களின் படப்பிடிப்புகளை விறுவிறுப்பாக நிறைவு செய்து, ரிலீஸுக்கான அடுத்த கட்ட வேலைகளில் தீவிரம் காட்டி வருகிறார்.
நலன் குமாரசாமி இயக்கத்தில் உருவாகியுள்ள ‘வா வாத்தியார்’ திரைப்படத்தின் ரிலீஸ் வேலைகள் ஒருபுறம் நடந்து வர, கார்த்தி நடிப்பில் பெரும் எதிர்பார்ப்பை ஏற்படுத்தியுள்ள ‘சர்தார் 2’ மற்றும் ‘மார்ஷல்’ ஆகிய படங்களின் படப்பிடிப்புகளும் தற்போது முழுமையாக நிறைவடைந்துள்ளன.
டப்பிங் பணிகளில் ‘சர்தார் 2’
பி.எஸ்.மித்ரன் இயக்கத்தில் கார்த்தி இரட்டை வேடங்களில் நடித்து 2022-ல் பிளாக்பஸ்டர் ஹிட்டான ‘சர்தார்’ படத்தின் இரண்டாம் பாகம் மிக பிரம்மாண்டமாக உருவாகி வருகிறது. பிரின்ஸ் பிக்சர்ஸ் தயாரிப்பில் உருவான ‘சர்தார் 2’ படத்தின் ஒட்டுமொத்தப் படப்பிடிப்பும் அண்மையில் நிறைவடைந்தது.
தற்போது இப்படத்திற்கான பின்னணி இசை, சிஜி (CG) மற்றும் டப்பிங் போன்ற போஸ்ட் புரொடக்ஷன் வேலைகள் மிக வேகமாக நடந்து வருகின்றன. சமீபத்தில் கார்த்தியின் பிறந்தநாளை முன்னிட்டு வெளியான இதன் சிறப்பு போஸ்டர் ரசிகர்களிடம் நல்ல வரவேற்பைப் பெற்ற நிலையில், படத்தின் டீசரை வெளியிடப் படக்குழு திட்டமிட்டுள்ளது. இப்படத்தில் எஸ்.ஜே.சூர்யா, மாளவிகா மோகனன், ஆஷிகா ரங்கநாத் ஆகியோர் முக்கிய கதாபாத்திரங்களில் நடித்துள்ளனர்.
நிறைவடைந்தது ‘மார்ஷல்’ படப்பிடிப்பு
இதேபோல், ‘டாணாக்காரன்’ பட இயக்குனர் தமிழ் இயக்கத்தில் கார்த்தி நடிக்கும் 29-வது திரைப்படமான ‘மார்ஷல்’ படத்தின் படப்பிடிப்பும் இறுதி கட்டத்தை எட்டி வெற்றிகரமாக முடிவடைந்துள்ளது.
டிரீம் வாரியர் பிக்சர்ஸ் தயாரிப்பில், கடல் பின்னணியில் கேங்ஸ்டர் கதைக் களத்தைக் கொண்டு உருவாகும் இத்திரைப்படத்தின் முதற்கட்டப் படப்பிடிப்பு சென்னை மற்றும் புதுச்சேரியிலும், இரண்டாம் கட்டப் படப்பிடிப்பு ராமேஸ்வரம் சுற்றியுள்ள பகுதிகளிலும் விறுவிறுப்பாக நடைபெற்றது. கல்யாணி பிரியதர்ஷன் கதாநாயகியாக நடிக்கும் இப்படத்திற்குச் சாய் அபயங்கர் இசையமைக்கிறார். நடிகர் ஆதி பினிஷெட்டி இதில் வில்லனாக மிரட்டலான கதாபாத்திரத்தில் நடித்துள்ளார்.
