அகமதாபாத்:
12-வது சர்வதேச யோகா தினத்தை முன்னிட்டு, குஜராத் மாநிலம் அகமதாபாத்தில் நடைபெற்ற பிரம்மாண்ட பொது யோகா நிகழ்ச்சியில் மத்திய உள்துறை மற்றும் கூட்டுறவுத்துறை அமைச்சர் அமித் ஷா கலந்துகொண்டு யோகாசனம் செய்தார்.
இந்த ஆண்டு யோகா தினம் “ஆரோக்கியமான முதுமைக்கான யோகா” (Yoga for Healthy Ageing) என்ற கருப்பொருளின் கீழ் நாடு முழுவதும் கோலாகலமாகக் கொண்டாடப்பட்டு வருகிறது.
பிரஹலாத் நகர் பூங்காவில் கொண்டாட்டம்
அகமதாபாத்தின் மேற்குப் பகுதியில் உள்ள புகழ்பெற்ற பிரஹலாத் நகர் பூங்காவில் (Prahlad Nagar Garden) இந்த சிறப்பு யோகா அமர்வு நடைபெற்றது. அதிகாலையிலேயே திரண்ட ஆயிரக்கணக்கான பொதுமக்கள், யோகா ஆர்வலர்கள் மற்றும் பாஜகவின் முக்கிய தலைவர்களுடன் இணைந்து மத்திய அமைச்சர் அமித் ஷாவும் பல்வேறு யோகாசனங்கள் மற்றும் மூச்சுப் பயிற்சிகளை மேற்கொண்டார்.
முன்னதாக, சர்வதேச யோகா தினத்தை முன்னிட்டு அவர் தனது எக்ஸ் (X) தள பக்கத்தில் வாழ்த்து தெரிவித்துப் பதிவிட்டிருந்தார்:
“யோகா என்பது இந்தியாவின் ஆன்மீகக் கொடையாகும். யோகா பயிற்சியின் மூலம் ஆரோக்கியமான உடல், அமைதியான மனம் மற்றும் நேர்மறை ஆற்றல் கொண்ட வாழ்க்கையைப் பெற முடியும். பிரதமர் நரேந்திர மோடியின் தொலைநோக்கு பார்வையால் இன்று யோகா உலகளாவிய வாழ்வியல் முறையாக மாறியுள்ளது.”
குஜராத் முழுவதும் பரவிய யோகா அலை
அமித் ஷா பங்கேற்ற அகமதாபாத் நிகழ்ச்சி மட்டுமின்றி, குஜராத் மாநிலம் முழுவதும் பள்ளி, கல்லூரிகள், பூங்காக்கள் மற்றும் கார்ப்பரேட் அலுவலகங்கள் என சுமார் 24,000 இடங்களில் யோகா நிகழ்ச்சிகள் ஒருங்கிணைக்கப்பட்டன. மாநில அளவிலான முக்கிய விழா காந்திநகரின் மான்சா பகுதியில் முதலமைச்சர் பூபேந்திர படேல் தலைமையில் நடைபெற்றது குறிப்பிடத்தக்கது.
தனித்துவமான முயற்சியாக, அகமதாபாத் ரயில்வே கோட்டம் சார்பில் ரயில் நிலைய வளாகங்கள் மட்டுமின்றி, இயக்கத்தில் இருந்த 4 வந்தே பாரத் எக்ஸ்பிரஸ் ரயில்களுக்குள்ளும் பயணிகளுடன் இணைந்து யோகா அமர்வுகள் நடத்தப்பட்டு இந்த ஆண்டு யோகா தினம் வித்யாசமாகக் கொண்டாடப்பட்டது.
