ஹெல்சின்கி: உக்ரைன் போருக்குப் பிறகு ரஷ்யாவிடமிருந்து இந்தியா தொடர்ந்து கச்சா எண்ணெய் வாங்குவது குறித்து மேற்கத்திய நாடுகள் விமர்சித்து வரும் நிலையில், ஐரோப்பிய நாடான பின்லாந்து எதிர்பாராத விதமாக இந்தியாவின் இந்த முடிவை நியாயப்படுத்தி ஆதரவு தெரிவித்துள்ளது.
பின்லாந்தில் நடைபெற்று வரும் புகழ்பெற்ற ‘குல்தரந்தா மாநாட்டில்’ (Kultaranta Talks) “வளர்ந்து வரும் சக்திகள் மற்றும் புதிய புவிசார் அரசியல் போட்டி” என்ற தலைப்பில் விவாதம் நடைபெற்றது. இதில் இந்திய வெளியுறவுத்துறை அமைச்சர் எஸ்.ஜெய்சங்கர், பின்லாந்து வெளியுறவு அமைச்சர் எலினா வால்டோனென் (Elina Valtonen) மற்றும் ஐக்கிய அரபு அமீரக அமைச்சர் லானா நுசிபெஹ் ஆகியோர் கலந்து கொண்டனர்.
அப்போது, இந்தியா ரஷ்யாவிடம் அதிகளவில் எண்ணெய் வாங்குவது குறித்து எழுப்பப்பட்ட கேள்விக்கு பின்லாந்து அமைச்சர் எலினா வால்டோனென் வியக்கத்தக்க வகையில் பதிலளித்தார்.
“விலைக் உச்சவரம்பு விதிகளுக்குள் தான் இந்தியா செயல்பட்டது”
மாநாட்டில் இந்தியாவின் நிலைப்பாட்டை நியாயப்படுத்தி பின்லாந்து வெளியுறவு அமைச்சர் எலினா பேசியதாவது:
“மேற்கத்திய நாடுகள் ரஷ்யா மீது பொருளாதாரத் தடைகளை விதித்து, கச்சா எண்ணெய்க்கு விலைக் உச்சவரம்பை (Oil Price Cap) அறிமுகப்படுத்திய போது, உலக நாடுகள் அனைத்தும் ரஷ்யாவிடமிருந்து எண்ணெய் வாங்குவதை முழுமையாகத் தடை செய்ய வேண்டும் என்று நாங்கள் கூறவில்லை.
உலகளாவிய எரிசக்தி சந்தையில் தட்டுப்பாடு ஏற்படுவதைத் தடுக்கவும், அதே நேரத்தில் ரஷ்யா அதிக லாபம் ஈட்டுவதைக் குறைக்கவும் மட்டுமே அந்த விதிகள் கொண்டு வரப்பட்டன. இந்தியாவின் பாதுகாப்பிற்காக நான் பேசுகிறேன்; அவர்கள் மேற்கத்திய நாடுகளின் அதே விலைக் உச்சவரம்பு விதிகளின் கீழ் தான் ரஷ்யாவிடமிருந்து எண்ணெய் வாங்கியுள்ளனர். அதுதான் அந்த விதியின் நோக்கமும் கூட.”
மேற்கத்திய நாடுகளின் போலித்தனம்: ஜெய்சங்கர் சாடல்
முன்னதாக, சர்வதேச சந்தையில் இந்தியாவின் எரிசக்தி கொள்கை குறித்து எழும் விமர்சனங்களுக்கு இந்திய வெளியுறவு அமைச்சர் எஸ்.ஜெய்சங்கர் தனது பாணியில் அதிரடியாகவும் நேரடியாகவும் பதிலடி கொடுத்தார்.
“இங்கு எந்தவொரு பெரிய கொள்கையோ அல்லது கோட்பாடோ இருப்பதாக யாரும் நடிக்கத் தேவையில்லை. தங்களுக்குச் சாதகமாக இருக்கும்போது ஒரு விதியை உருவாக்குவதும், சாதகமில்லாத போது அதனை மாற்றுவதும் தான் மேற்கத்திய நாடுகளின் வாடிக்கையாக உள்ளது.
2022-ல் உக்ரைன் போர் தொடங்கிய போது, உலகச் சந்தையை ஸ்திரப்படுத்த ரஷ்யாவிடமிருந்து எண்ணெய் வாங்குமாறு அமெரிக்காவே நேரடியாக இந்தியாவிடம் கேட்டுக் கொண்டது. ஆனால், அடுத்த ஆண்டே அதற்கு அவர்கள் வரி விதித்தார்கள்; பின்னர் மீண்டும் அதனைத் திரும்பப் பெற்றார்கள். நாம் அனைவரும் வளர்ந்த மனிதர்கள், இங்கு என்ன விளையாட்டு நடக்கிறது என்பது நமக்கு நன்றாகவே தெரியும். எனவே, இதில் யாரும் தார்மீகப் போதனை செய்யத் தேவையில்லை,” என்று ஜெய்சங்கர் காட்டமாகச் சாடினார்.
ஐரோப்பிய நாடுகள் தங்களின் தேவைகளுக்காக மத்திய கிழக்கு நாடுகளின் எண்ணெயை முழுமையாக வாங்கத் தொடங்கியதால், இந்தியாவின் பாரம்பரிய விநியோகம் பாதிக்கப்பட்டு, வேறு வழியின்றி சந்தை நிலவரத்தின் அடிப்படையில் மலிவான விலையில் கிடைத்த ரஷ்ய எண்ணெயை இந்தியா வாங்க வேண்டிய சூழல் உருவானது என்றும் அவர் விளக்கினார்.
மேற்கத்திய கூட்டமைப்பில் உள்ள ஒரு முக்கிய ஐரோப்பிய நாடான பின்லாந்தே, இந்தியா சர்வதேச விதிகளை மீறவில்லை என்றும், அதன் செயல்பாடு சரியானது தான் என்றும் சர்வதேச மேடையில் ஒப்புக்கொண்டிருப்பது உலக அரங்கில் இந்தியாவின் வெளியுறவுக் கொள்கைக்குக் கிடைத்த மிகப்பெரிய வெற்றியாகப் பார்க்கப்படுகிறது.
