திருவண்ணாமலை: அகில இந்திய ரியல் எஸ்டேட் கூட்டமைப்பு (FAIRA) சார்பாகப் பொறுப்பாளர்கள் ஆலோசனை மற்றும் சிறப்புக் கலந்தாய்வுக் கூட்டம் திருவண்ணாமலையில் நடைபெற்றது.
இக்கூட்டத்திற்கு FAIRA அமைப்பின் நிறுவனரும் தேசியத் தலைவருமான டாக்டர் A. ஹென்றி தலைமை தாங்கி, ரியல் எஸ்டேட் துறை சார்ந்த நடைமுறைச் சிக்கல்கள், ஆன்லைன் பதிவு முறை மற்றும் சட்டரீதியான சந்தேகங்களுக்கு விளக்கமளித்து ஆலோசனைகளை வழங்கினார்.
கூட்டத்தில் விவாதிக்கப்பட்ட முக்கிய அம்சங்கள் மற்றும் கோரிக்கைகள்:
- ஆன்லைன் ஆவணப் பதிவு: புதிய மனைப்பிரிவுகள் மற்றும் அடுக்குமாடி குடியிருப்புகளின் முதல் விற்பனைக்கு அறிமுகப்படுத்தப்பட்டுள்ள ‘Anywhere Registration’ ஆன்லைன் முறை வெளிப்படைத்தன்மையுடனும், தொழில் நுட்பக் கோளாறுகள் இன்றியும் விரைவாகச் செயல்பட நடவடிக்கை எடுக்க வேண்டும்.
- DTCP மற்றும் உள்ளாட்சி அனுமதி காலதாமதம்: “ஒரே விண்ணப்பம் – ஒரே சாளரம் – ஒரே முடிவு” என்ற அடிப்படையில் DTCP, மாநகராட்சி மற்றும் ஊராட்சி அமைப்புகளுக்கிடையே ஒருங்கிணைப்பை ஏற்படுத்தி, மனைப்பிரிவு அனுமதிகளுக்குத் தெளிவான காலக்கெடு நிர்ணயிக்கப்பட வேண்டும்.
- தானப் பத்திரப் பிரச்சனைகள்: பழைய மனைப்பிரிவுகளில் உள்ள சாலைகள் மற்றும் பொதுப் பயன்பாட்டு நிலங்களை உள்ளாட்சிக்கு தானமாக வழங்குவதில் ஏற்படும் காலதாமதம் மற்றும் கூடுதல் செலவுச் சுமைகளைத் தவிர்க்க எளிமையான ஆன்லைன் நடைமுறை கொண்டு வரப்பட வேண்டும்.
- 20 அடி சாலைகளுக்கு நடைமுறைத் தீர்வு: திருவண்ணாமலை மாநகராட்சியுடன் புதிதாக இணைக்கப்பட்ட பகுதிகளில் உள்ள பழைய 20 அடி அணுகுசாலைகளைக் கருத்தில் கொண்டு, புதிய மனைப்பிரிவு அனுமதிகளுக்குத் தகுந்த மாற்று வழிமுறைகளை அரசு பரிசீலிக்க வேண்டும்.
- வழிகாட்டி மதிப்பு முரண்பாடு: சில பகுதிகளில் சந்தை மதிப்பு சதுர அடிக்கு ₹2,000 ஆக உள்ள நிலையில், வழிகாட்டி மதிப்பு ₹8,000 ஆக உள்ளது. இத்தகைய அதிகப்படியான முரண்பாடுகளை அறிவியல் ரீதியாக ஆய்வு செய்து மறுபரிசீலனை செய்ய வேண்டும்.
- TNRERA காலக்கெடு: தமிழ்நாடு ரியல் எஸ்டேட் ஒழுங்குமுறை ஆணையத்தில் (TNRERA) சமர்ப்பிக்கப்படும் விண்ணப்பங்கள் மற்றும் அனுமதிகளுக்குக் குறிப்பிட்ட காலக்கெடு மற்றும் ஆன்லைன் கண்காணிப்பு வசதி ஏற்படுத்த வேண்டும்.
“விதிமுறைகள் இருக்க வேண்டும்; ஆனால் அவை மக்களைச் சிரமப்படுத்தக் கூடாது. ரியல் எஸ்டேட் துறை வெளிப்படையான நிர்வாகத்துடனும், வேகமான அனுமதிகளுடனும் செயல்பட அரசு விரைந்து நடவடிக்கை எடுக்க வேண்டும்” என இக்கூட்டத்தில் ஒருமனதாக வலியுறுத்தப்பட்டது.
