CMDA ஆன்லைன் அனுமதி முறையில் உலகத் தரச் சீர்திருத்தங்கள் தேவை: “ஒரே நாடு – ஒரே சொத்து – ஒரே அனுமதி” – FAIRA தேசியத் தலைவர் வலியுறுத்தல்!

சென்னை: சென்னை பெருநகர வளர்ச்சிக் குழுமத்தின் (CMDA) ஆன்லைன் திட்ட அனுமதி முறைமையை உலகத்தரம் வாய்ந்ததாக மாற்றவும், அதில் நவீன டிஜிட்டல் சீர்திருத்தங்களை புகுத்தவும் அகில இந்திய ரியல் எஸ்டேட் கூட்டமைப்பு (FAIRA) வலியுறுத்தியுள்ளது.

ஆலோசனைக் கூட்டத்தில் முக்கியப் பரிந்துரைகள்

CMDA ஏற்பாடு செய்திருந்த பங்குதாரர்கள் ஆலோசனைக் கூட்டத்தில், FAIRA அமைப்பின் நிறுவனர் மற்றும் தேசியத் தலைவர் டாக்டர் ஆ. ஹென்றி கலந்துகொண்டு, தமிழகத்தின் ரியல் எஸ்டேட் மற்றும் கட்டுமானத் துறையை மேம்படுத்துவதற்கான விரிவான பரிந்துரைகளை முன்வைத்தார்.

தற்போது நிலவும் நிர்வாகச் சிக்கல்களை நீக்கி, “One Nation – One Property – One Approval System” என்ற தேசிய அளவிலான நிர்வாக மாதிரியைத் தமிழ்நாடு முன்னோடியாக உருவாக்க வேண்டும் என்று அவர் கேட்டுக் கொண்டார்.

முன்வைக்கப்பட்ட முக்கிய சீர்திருத்தங்கள்:

• ஒருங்கிணைந்த தரவுத்தளம் (API Integration): வருவாய்த்துறை, பதிவுத்துறை, உள்ளாட்சி அமைப்புகள், மின்சார வாரியம், தீயணைப்புத்துறை என கட்டுமான அனுமதியுடன் தொடர்புடைய அனைத்துத் துறைகளையும் ஒரே தளத்தில் இணைக்க வேண்டும்.
• தானியங்கி அனுமதி (Auto-NOC): ஜிஐஎஸ் (GIS) தொழில்நுட்பத்தைப் பயன்படுத்தி, விமான நிலைய பாதுகாப்பு மண்டலம், நீர்நிலை பாதுகாப்பு பகுதி போன்றவற்றைத் தானாகவே சரிபார்த்து, NOC தேவையில்லாத நிலங்களுக்கு உடனடி அனுமதி வழங்க வேண்டும்.
• AI தொழில்நுட்பம்: கட்டிட வரைபடங்களைச் செயற்கை நுண்ணறிவு (AI) மூலம் நொடிகளில் சரிபார்க்கும் ‘AI Scrutiny Engine’-ஐ அறிமுகப்படுத்த வேண்டும். இது கட்டிட விதிகள் மீறப்படுவதைத் துல்லியமாகத் தடுக்கும்.
• டிஜிட்டல் பாஸ்போர்ட்: தமிழ்நாட்டில் உள்ள ஒவ்வொரு நிலத்திற்கும் ‘Property Digital Passport’ உருவாக்கி, அதன் பட்டா, சிட்டா, வரைபடங்கள் உள்ளிட்ட அனைத்து விவரங்களையும் ஒரே இடத்தில் கிடைக்கச் செய்ய வேண்டும்.
• காலக்கெடுவுடன் கூடிய அனுமதி (Deemed Approval): நிர்ணயிக்கப்பட்ட காலத்திற்குள் அதிகாரிகள் கோப்புகளை முடிக்காத பட்சத்தில், தானாகவே அனுமதி வழங்கப்பட்டதாகக் கருதப்படும் ‘Deemed Approval’ நடைமுறையை அமல்படுத்த வேண்டும்.

“ஊழலற்ற வெளிப்படையான நிர்வாகம்”

தனது உரையில் பேசிய டாக்டர் ஆ. ஹென்றி, “எதிர்கால தமிழ்நாட்டில் ஒரு குடிமகன் தனது நிலத்தின் சர்வே எண்ணைப் பதிவிட்டாலே, அந்த நிலத்தின் அனைத்துத் தகவல்களும் கிடைக்கும் நிலை உருவாக வேண்டும். இது ஊழலற்ற, வெளிப்படையான மற்றும் முதலீட்டாளர்களுக்கு உகந்த சூழலை உருவாக்கும்” என்று தெரிவித்தார்.

CMDA போர்ட்டலை வெறும் விண்ணப்பப் பதிவேற்றத் தளமாக இல்லாமல், ‘ஸ்மார்ட் அர்பன் கவர்னன்ஸ் பிளாட்ஃபார்மாக’ (Smart Urban Governance Platform) மாற்றினால், அனுமதி காலம் கணிசமாகக் குறைந்து தமிழகம் இந்தியாவின் முன்னணி டிஜிட்டல் மாநிலமாக உயரும் என்று அவர் நம்பிக்கை தெரிவித்தார்.