பெங்களூரு: காவிரி ஆற்றின் குறுக்கே மேகதாதுவில் அணை கட்டும் விவகாரத்தில், தமிழ்நாடு அரசுக்கு கர்நாடக துணை முதலமைச்சரும், நீர்ப்பாசனத் துறை அமைச்சருமான டி.கே.சிவகுமார் மீண்டும் ஒருமுறை பகிரங்கமாகச் சவால் விடுத்துள்ளார். தமிழ்நாட்டின் எதிர்ப்புகளைத் தாண்டி, மேகதாதுவில் அணை கட்டியே தீருவோம் என அவர் திட்டவட்டமாகக் கூறியுள்ளார்.
உச்ச நீதிமன்றத்தில் மேகதாது விவகாரம் தொடர்பாகத் தமிழ்நாடு அரசு தாக்கல் செய்திருந்த மறு ஆய்வு மனு நிராகரிக்கப்பட்டதைத் தொடர்ந்து, அவர் இந்த அதிரடி கருத்தைத் தெரிவித்துள்ளார்.
டி.கே.சிவகுமார் பேசியதாவது:
“மேகதாது விவகாரம் தொடர்பாகத் தமிழ்நாடு அரசு தாக்கல் செய்திருந்த மறு ஆய்வு மனுவை உச்ச நீதிமன்றம் அதிரடியாக நிராகரித்துவிட்டது. மேலும், இந்த வழக்கை விசாரிக்க ஒரு புதிய அமர்வு (New Bench) அமைக்கப்பட்டுள்ளது. இது கர்நாடக மாநிலத்திற்கு கிடைத்துள்ள மிக முக்கியமான நற்செய்தியாகும்.
இனி தமிழ்நாடு அரசு என்ன வேண்டுமானாலும் செய்து கொள்ளட்டும், எங்களை தடுக்க முடியாது. மேகதாது பகுதியில் நிச்சயமாக நாங்கள் புதிய அணையை கட்டியே தீருவோம்.”
நீடிக்கும் சர்ச்சை: காவிரி நதிநீர் பங்கீட்டு விதிகளின்படி, தங்களின் அனுமதியின்றி கர்நாடகா மேகதாதுவில் அணை கட்டக் கூடாது எனத் தமிழ்நாடு அரசு தொடர்ந்து சட்டப் போராட்டங்களை நடத்தி வருகிறது. அணை கட்டப்பட்டால் தமிழக டெல்டா மாவட்டங்களின் விவசாயம் முற்றிலும் பாதிக்கப்படும் எனத் தமிழகம் எதிர்க்கும் சூழலில், உச்ச நீதிமன்றத்தின் புதிய நகர்வுகளைச் சுட்டிக்காட்டி கர்நாடக துணை முதல்வர் விடுத்துள்ள இந்த சவால், இரு மாநிலங்களுக்கும் இடையேயான காவிரி நதிநீர் மோதலை மீண்டும் உச்சக்கட்டத்திற்கு கொண்டு சென்றுள்ளது.
