குழந்தைகளுக்கு எதிரான பாலியல் துஷ்பிரயோகம் தொடர்பான ஆன்லைன் பொருட்கள், புகைப்படங்கள் அல்லது வீடியோக்களை (CSEAM – Child Sexual Exploitation and Abuse Material) உருவாக்குவது, சேமிப்பது அல்லது பகிர்வது இந்தியச் சட்டப்படி மிகக் கடுமையான குற்றமாகும். இது குறித்து தமிழ்நாடு சைபர் கிரைம் பிரிவு காவல்துறை மிக முக்கியமான விழிப்புணர்வு எச்சரிக்கையை விடுத்துள்ளது.
சட்டப்படி இது குற்றமாகும்:
- பகிரக் கூடாது: இதுபோன்ற எந்தவொரு ஆபாச அல்லது வன்கொடுமைப் பொருட்களை வாட்ஸ்அப், டெலிகிராம் அல்லது சமூக வலைத்தளங்களில் யாருக்கும் ஃபார்வர்ட் (Forward) செய்யக் கூடாது.
- சேமிக்கக் கூடாது: மொபைல் போன் அல்லது கணினியில் டவுன்லோட் செய்து சேமித்து வைப்பதும் (Save) குற்றமாகும்.
- போக்ஸோ (POCSO) மற்றும் தகவல் தொழில்நுட்பச் சட்டத்தின் (IT Act) கீழ் இதற்கு ஜாமீனில் வெளிவர முடியாத கடுமையான சிறைத்தண்டனை விதிக்கப்படும்.
பாதுகாக்க நாம் செய்ய வேண்டியவை: இணையதளத்திலோ அல்லது சமூக ஊடகங்களிலோ குழந்தைகளுக்கு எதிரான இதுபோன்ற அத்துமீறல்களை நீங்கள் கண்டால், அதை வேடிக்கை பார்க்காமல் அல்லது கடந்து செல்லாமல் உடனடியாகப் புகார் அளிக்க வேண்டும்.
📞 உதவி எண்கள் மற்றும் புகார் இணையதளம்:
- 1098 – குழந்தைகளுக்கான அவசர உதவி எண் (Child Helpline)
- 181 – பெண்களுக்கான ஒரு நிறுத்த உதவி மையம் (One Stop Center)
- 1930 – தேசிய சைபர் கிரைம் உதவி எண் (Cyber Crime Helpline)
- www.cybercrime.gov.in – அதிகாரப்பூர்வ ஆன்லைன் புகார் தளம்
குழந்தைகளின் பாதுகாப்பை உறுதி செய்ய, இதுபோன்ற சைபர் குற்றங்களைக் கண்டறிந்து உடனடியாகத் தகவல் கொடுப்பது நம் ஒவ்வொருவரின் சமூகக் கடமையாகும்.
