சென்னை:
சூப்பர் ஸ்டார் ரஜினிகாந்த் நடிப்பில் ஒட்டுமொத்த கோலிவுட்டும் ஆவலோடு எதிர்பார்த்துக் கொண்டிருந்த ‘தலைவர் 173’ திரைப்படத்தின் அதிகாரப்பூர்வ தலைப்பு மற்றும் ஃபர்ஸ்ட் லுக் போஸ்டரை தயாரிப்பு நிறுவனமான ராஜ் கமல் ஃபிலிம்ஸ் இன்டர்நேஷனல் (RKFI) இன்று அதிகாரப்பூர்வமாக வெளியிட்டுள்ளது.
‘தலைவர் 173’ இனி ‘தர்மன்’!
கமல்ஹாசன் தயாரிப்பில், அஸ்வத் மாரிமுத்து இயக்கத்தில் உருவாகும் இந்த பிரம்மாண்ட திரைப்படத்திற்கு ‘தர்மன்’ (Dharman) என பெயரிடப்பட்டுள்ளது. மேலும் இந்த படத்திற்கு “தர்மமே வெல்லும்!” என்ற அதிரடியான டேக்லைனும் சூட்டப்பட்டுள்ளது.
மிரட்டலான ‘தி டெட்லி டாக்டர்’ ஃபர்ஸ்ட் லுக்!
தலைப்பு அறிவிப்புடன் வெளியான ஃபர்ஸ்ட் லுக் போஸ்டர் தற்போது சமூக வலைத்தளங்களில் காட்டுத்தீயாய் பரவி வருகிறது. இந்த போஸ்டரில் ரஜினிகாந்த் சால்ட் அண்ட் பெப்பர் ஹேர் ஸ்டைல் மற்றும் கூலிங் கிளாஸ் அணிந்து, நீல நிற ஆபரேஷன் தியேட்டர் உடையில் (Surgical Attire) மிரட்டலான தோற்றத்தில் காணப்படுகிறார்.
அவரது கையில் ரத்தம் தோய்ந்த ஆபரேஷன் கத்தி (Scalpel) இருக்க, அவரது காலுக்கு கீழே ஒரு உடல் கிடப்பது போன்றும், ஆபரேஷன் தியேட்டரின் உடைந்த கண்ணாடித் துண்டுகள் சிதறி இருப்பது போன்றும் போஸ்டர் வடிவமைக்கப்பட்டுள்ளது. போஸ்டரின் கீழே ‘The Deadly Doctor’ (கொடிய மருத்துவர்) என்ற வாசகமும் இடம் பெற்றுள்ளது. இதன் மூலம் ரஜினிகாந்த் இப்படத்தில் ஆக்ஷன் கலந்த ஒரு பவர்ஃபுல் மருத்துவர் கதாபாத்திரத்தில் நடிக்கிறார் என்பது தெளிவாகியுள்ளது.
அனிருத் இசையில் 8 பாடல்கள்
‘ஓ மை கடவுளே’ பட புகழ் அஸ்வத் மாரிமுத்து இயக்கும் இந்த படத்திற்கு ராக்ஸ்டார் அனிருத் இசையமைக்கிறார். இப்படத்தில் மொத்தம் 8 பாடல்கள் இடம் பெறப்போவதாக இயக்குநர் ஏற்கனவே ஹின்ட் கொடுத்துள்ளதால் பாடல்கள் மீதான எதிர்பார்ப்பு அதிகரித்துள்ளது. ஸ்டண்ட் மாஸ்டர்கள் அன்பறிவ் இப்படத்தின் அதிரடி சண்டைக்காட்சிகளை வடிவமைக்கின்றனர்.
சென்னை பூந்தமல்லியில் உள்ள பிரம்மாண்ட செட்டில் இப்படத்தின் முதற்கட்ட படப்பிடிப்பு சாண்டி மாஸ்டரின் நடன இயக்கத்தில் ஒரு மாஸ் பாடலுடன் இன்று முதல் விறுவிறுப்பாகத் தொடங்கியுள்ளது. தமிழ் சினிமாவின் இரு பெரும் ஜாம்பவான்களான ரஜினிகாந்தும், கமல்ஹாசனும் நீண்ட வருடங்களுக்குப் பிறகு இந்த படத்தின் மூலம் (நடிகர்-தயாரிப்பாளர்) இணைந்துள்ளதால் ‘தர்மன்’ படத்தின் மீதான எதிர்பார்ப்பு இப்போதே விண்ணைத் தொட்டுள்ளது.
