சென்னை:
தமிழகத்தில் காவிரி, கொள்ளிடம் மற்றும் பாலாறு உள்ளிட்ட ஆறுகளில் புதிதாக 12 மணல் குவாரிகளைத் திறப்பதற்கான பூர்வாங்கப் பணிகளைத் தமிழக அரசு மேற்கொண்டு வருவதாக வெளியாகி உள்ள தகவல்களுக்குப் பாமக தலைவர் டாக்டர் அன்புமணி இராமதாஸ் கடும் கண்டனம் தெரிவித்துள்ளார்.
இதுகுறித்து அவர் வெளியிட்டுள்ள விரிவான அறிக்கையில் கூறியிருப்பதாவது:
“ஏற்கனவே தமிழ்நாட்டின் பெரும்பாலான ஆற்றுப் படுக்கைகளில் விதிகளை மீறி அளவுக்கு அதிகமாக மணல் அள்ளப்பட்டதன் விளைவாக, நிலத்தடி நீர்மட்டம் பாதாளத்திற்குச் சென்றுவிட்டது. பல மாவட்டங்களில் விவசாயமும், குடிநீர் ஆதாரமும் கடுமையான பாதிப்புக்கு உள்ளாகியிருக்கின்றன.
இத்தகையச் சூழலில், சுற்றுச்சூழலையும் விவசாயிகளின் வாழ்வாதாரத்தையும் அச்சுறுத்தும் வகையில் மேலும் 12 புதிய மணல் குவாரிகளைத் திறக்க அரசு முயல்வது முற்றிலும் சுயநலமான மற்றும் இயற்கை அழிவுக்கான செயலாகும். ஆறுகளைத் தற்காப்பதுதான் ஒரு மக்கள் அரசின் கடமையே தவிர, அதை வணிகப் பொருளாக்குவது அல்ல. எனவே, இந்தத் திட்டத்தை அரசு உடனடியாகக் கைவிட வேண்டும்.”
மாற்றுத் தீர்வுகளை நோக்கி நகர்க:
மணல் தட்டுப்பாட்டைப் போக்க இயற்கை மணலுக்கு மாற்றாக ‘எம்-சாண்ட்’ (M-Sand) பயன்பாட்டை அரசு முழுமையாக ஊக்குவிக்க வேண்டும் என்றும், அண்டை மாநிலங்கள் மற்றும் வெளிநாடுகளில் இருந்து மணல் இறக்குமதி செய்யும் சாத்தியக்கூறுகளை ஆராய வேண்டுமே தவிர, சொந்த மாநிலத்தின் இயற்கை வளங்களைச் சூறையாடக் கூடாது என்றும் பாமக தரப்பில் சுட்டிக்காட்டப்பட்டுள்ளது.
புதிதாகத் திட்டமிடப்பட்டுள்ள குவாரிகள் அமைந்தால் டெல்டா மாவட்டங்கள் உட்படப் பல பகுதிகளில் சுற்றுச்சூழல் சமநிலை சீர்குலையும் எனச் சுற்றுச்சூழல் ஆர்வலர்களும் எச்சரித்து வரும் நிலையில், அன்புமணியின் இந்த அறிக்கை அரசியல் அரங்கில் கவனம் பெற்றுள்ளது.
