அமெரிக்கத் தலைநகர் வாஷிங்டன் டி.சி.யில் உள்ள புகழ்பெற்ற நேஷனல் மால் (National Mall) பகுதியில், அதிபர் டொனால்ட் ட்ரம்ப் மற்றும் மறைந்த சர்ச்சை தொழிலதிபர் ஜெப்ரி எப்ஸ்டீன் ஆகிய இருவரின் உருவங்கள் அடங்கிய வினோதமான சிலை ஒன்று வைக்கப்பட்டுள்ளது பெரும் பரபரப்பை ஏற்படுத்தியுள்ளது. ‘சீக்ரெட் ஹேண்ட்ஷேக்’ (Secret Handshake) என்ற மர்மமான கலை அமைப்பு இந்தச் சிலையை நிறுவியுள்ளது.
சர்ச்சைக்குரிய ‘டைட்டானிக்’ போஸ்: புகழ்பெற்ற ‘டைட்டானிக்’ திரைப்படத்தில் ஜாக் மற்றும் ரோஸ் கப்பலின் முனையில் நிற்பது போன்ற அதே பாணியில் இந்தச் சிலை வடிவமைக்கப்பட்டுள்ளது. இதில் எப்ஸ்டீன் கைகளை விரித்திருக்க, பின்னால் இருந்து அவரை ட்ரம்ப் கட்டியணைத்தபடி இருக்கும் வகையில் சிலை செதுக்கப்பட்டுள்ளது. இந்தச் சிலைக்குக் கீழே “அவர்கள் இருவரும் ஒருவருக்கொருவர் தெரிந்தவர்கள்” (They Knew Each Other) என்ற வாசகம் பொறிக்கப்பட்டுள்ளது, இது அவர்களின் பழைய நட்பைக் கிண்டல் செய்யும் விதமாக அமைந்துள்ளது.
அரசியல் பின்னணி: இந்தச் சிலையை நிறுவியுள்ள ‘Secret Handshake’ அமைப்பு, இது ஒரு அரசியல் நையாண்டி (Political Satire) எனக் குறிப்பிட்டுள்ளது. ஜெப்ரி எப்ஸ்டீன் தொடர்பான வழக்குகளில் பல முக்கியப் புள்ளிகளின் பெயர்கள் அடிபட்ட நிலையில், ட்ரம்ப் அவருடன் நெருக்கமாக இருந்த காலத்தை நினைவுபடுத்தும் நோக்கில் இந்தச் சிலை வைக்கப்பட்டுள்ளதாகக் கூறப்படுகிறது. இருப்பினும், அனுமதி இன்றி பொது இடத்தில் சிலை வைக்கப்பட்டதால், அதிகாரிகள் இதனை அகற்ற நடவடிக்கை எடுத்து வருகின்றனர்.
