டெஹ்ரான்:
மத்திய கிழக்கு பிராந்தியத்தில் அமெரிக்காவிற்கும் ஈரானுக்கும் இடையே நிலவி வந்த 15 நாள் தீவிர மோதலின் போது, வளைகுடாவில் உள்ள அமெரிக்க ராணுவத் தளங்களில் நிறுத்தப்பட்டிருந்த 11 அமெரிக்கப் போர் விமானங்கள் மற்றும் ஹெலிகோப்டர்களைத் தரையிலேயே அழித்துள்ளதாக ஈரானிய புரட்சிகர காவல் படை (IRGC) அதிரடியாக அறிவித்துள்ளது.
ஈரானின் தாக்குதலும் சேத விவரங்களும்
ஈரானிய புரட்சிகர காவல் படையின் (IRGC) செய்தித் தொடர்பாளர் பிரிகேடியர் ஜெனரல் ஹொசைன் மொஹேபி இது குறித்து வெளியிட்டுள்ள அறிக்கையில், கடந்த ஜூலை 8 முதல் ஜூலை 22 வரையிலான 15 நாட்களில் நடத்தப்பட்ட பதில் தாக்குதல்கள் குறித்த விவரங்களைப் பகிர்ந்துகொண்டார்.
அவரது கூற்றுப்படி ஈரானிய படைகள் அழித்ததாகக் கூறப்படும் அமெரிக்க ராணுவச் சொத்துகள்:
- போர் விமானங்கள் மற்றும் ஹெலிகோப்டர்கள்: பாதுகாக்கப்பட்ட கொட்டகையில் (Hangar) நிறுத்தப்பட்டிருந்த 1 எஃப்-15 (F-15) போர் விமானம், 1 பி-8 (P-8) கடல்சார் கண்காணிப்பு விமானம், 1 சி-17 (C-17) ராணுவப் போக்குவரத்து விமானம், 8 எரிபொருள் நிரப்பும் விமானங்கள் (Refueling aircraft) மற்றும் ஹெலிகோப்டர்கள்.
- ட்ரோன்கள்: அசெம்பிள் செய்யப்படாத 8 புதிய ட்ரோன்கள் உட்பட மொத்தம் 17 அதிநவீன கண்காணிப்பு மற்றும் செயல்பாட்டு ட்ரோன்கள் (Drones).
- ரடார்கள் மற்றும் கட்டுப்பாட்டு மையங்கள்: 9 கட்டளை மற்றும் கட்டுப்பாட்டு மையங்கள், 6 பேட்ரியாட் வான் பாதுகாப்பு ரடார்கள் மற்றும் பல ஏவுகணைச் சேமிப்புக் கிடங்குகள்.
பின்னணியும் பதற்றமும்
ஹார்முஸ் ஜலசந்தியின் கட்டுப்பாடு மற்றும் கப்பல் போக்குவரத்து தொடர்பாக இரு நாடுகளுக்கும் இடையே உருவான முரண்பாடுகளைத் தொடர்ந்து இந்தப் போர் மூண்டது. அமெரிக்காவின் தாக்குதல்களுக்குப் பதிலடியாக, பிராந்தியத்தில் உள்ள அமெரிக்க ராணுவத் தளங்களை இலக்கு வைத்து ஈரான் ஏவுகணைகள் மற்றும் டிரோன்களை வீசித் தாக்குதல் நடத்தியதாகக் கூறியுள்ளது.
இருப்பினும், ஈரானின் இந்தக் கோரிக்கைகள் குறித்து அமெரிக்கப் பென்டகன் தரப்பில் இருந்து இதுவரை அதிகாரப்பூர்வமான எந்தப் பதிலும் அளிக்கப்படவில்லை. அதேவேளையில், ஈரானின் இந்தத் தாக்குதல் எச்சரிக்கையைத் தொடர்ந்து அமெரிக்கா தன் முக்கியப் போர் விமானங்களைச் சில தளங்களில் இருந்து பாதுகாப்பான இடங்களுக்கு மாற்றியிருப்பதாகச் செயற்கைக்கோள் புகைப்படத் தகவல்கள் தெரிவிக்கின்றன.
