மாஸ்கோ: ரஷியா மீது உக்ரைன் ராணுவம் சுமார் 300-க்கும் மேற்பட்ட அதிநவீன பிக்சட்-விங் (Fixed-wing) வகை ட்ரோன்களை ஏவி வரலாற்றிலேயே இல்லாத அளவிற்கு மிகப்பெரிய வான்வழித் தாக்குதலை நடத்தியுள்ளது. பாதுகாப்பு கருதி தலைநகர் மாஸ்கோவின் 4 முக்கிய சர்வதேச விமான நிலையங்கள் உட்பட நாட்டின் பல விமான நிலையங்கள் தற்காலிகமாக மூடப்பட்டன.
கடந்த சில மாதங்களாகவே ரஷியாவின் எண்ணெய் சுத்திகரிப்பு நிலையங்கள் மற்றும் ராணுவ தளங்களை குறிவைத்து உக்ரைன் தாக்குதல் நடத்தி வருகிறது. இதன் தொடர்ச்சியாக, நேற்று ஒரே இரவில் ரஷியாவின் 12-க்கும் மேற்பட்ட பிராந்தியங்களை குறிவைத்து உக்ரைன் ராணுவம் இந்த பிரம்மாண்ட ட்ரோன் தாக்குதலை முன்னெடுத்துள்ளது.
இதுகுறித்து ரஷிய பாதுகாப்பு அமைச்சகம் வெளியிட்டுள்ள அறிக்கையில், “உக்ரைன் தரப்பில் இருந்து ஏவப்பட்ட 287-க்கும் மேற்பட்ட ட்ரோன்கள் ரஷிய வான் பாதுகாப்பு அமைப்புகளால் (Air Defense Systems) வெற்றிகரமாக சுட்டொழிக்கப்பட்டன. குறிப்பாக, உக்ரைன் எல்லையை ஒட்டியுள்ள பிரையன்ஸ்க் (Bryansk) பகுதியில் மட்டும் 118 ட்ரோன்களும், கலகா (Kaluga) மற்றும் மாஸ்கோ பிராந்தியங்களில் தலா 40 ட்ரோன்களும் சுட்டு வீழ்த்தப்பட்டுள்ளன” எனத் தெரிவிக்கப்பட்டுள்ளது.
விமான நிலையங்கள் மூடல் – 350+ விமானங்கள் பாதிப்பு: தலைநகர் மாஸ்கோவை நோக்கி 30-க்கும் மேற்பட்ட ட்ரோன்கள் சீறிப்பாய்ந்ததால், அங்கு கடுமையான பாதுகாப்பு எச்சரிக்கை விடுக்கப்பட்டது. இதன் காரணமாக மாஸ்கோவின் முதன்மை விமான நிலையங்களான ஷெரெமெட்டியேவோ (Sheremetyevo), டொமோடெடோவோ (Domodedovo), வ்னுகோவோ (Vnukovo) மற்றும் சுகோவ்ஸ்கி (Zhukovsky) ஆகிய நான்கு சர்வதேச விமான நிலையங்களும் உடனடியாக மூடப்பட்டன.
சுமார் 7 மணி நேரத்திற்கும் மேலாக நீடித்த இந்த வான்வெளி முடக்கத்தால், மாஸ்கோவிற்கு வரவிருந்த மற்றும் அங்கிருந்து புறப்படவிருந்த 370-க்கும் மேற்பட்ட உள்நாட்டு மற்றும் சர்வதேச விமானங்கள் ரத்து செய்யப்பட்டன அல்லது வேறு நகரங்களுக்கு திருப்பி விடப்பட்டன. ஆர்மீனிய பிரதமரின் தனி விமானம் கூட மாஸ்கோவில் தரையிறங்க முடியாமல் செயின்ட் பீட்டர்ஸ்பர்க் நகரத்திற்கு திருப்பி விடப்பட்டது குறிப்பிடத்தக்கது.
சேதங்கள்: ட்ரோன்களின் பாகங்கள் குடியிருப்புப் பகுதிகள் மற்றும் மின் உற்பத்தி நிலையங்கள் மீது விழுந்ததில் சில கட்டிடங்கள் சேதமடைந்தன. வொரோனேஷ் (Voronezh) பகுதியில் உள்ள ஒரு அடுக்குமாடி குடியிருப்பின் படிக்கட்டு பகுதி இடிந்து விழுந்ததால் 80-க்கும் மேற்பட்ட பொதுமக்கள் அவசரமாக வெளியேற்றப்பட்டனர். இருப்பினும், இந்த மிகப்பெரிய தாக்குதலில் பெரிய அளவில் உயிர்ச்சேதங்கள் ஏதும் ஏற்படவில்லை என ரஷிய அதிகாரிகள் தரப்பில் உறுதி செய்யப்பட்டுள்ளது. தற்போது நிலைமை சீரடைந்ததை அடுத்து விமான நிலையங்கள் மீண்டும் தற்காலிகமாகத் திறக்கப்பட்டு, விமான சேவைகள் வழக்கம் போல் இயங்கத் தொடங்கியுள்ளன.
