பயோமெட்ரிக் சோதனையில் சிக்கிய ‘முன்னா பாய்’கள்: பீகார் நீட் மறுதேர்வில் அசல் மாணவர்களுக்குப் பதில் எழுதிய மருத்துவர்கள் மாட்டியது எப்படி?

பாட்னா:

நாடு முழுவதும் பெரும் விவாதப் பொருளாக மாறியுள்ள நீட் (NEET) மறுதேர்வில், அசல் மாணவர்களுக்குப் பதிலாகப் போலி தேர்வர்கள் (Proxy Writers) தேர்வு எழுதிய விவாதம் பெரும் அதிர்ச்சியை ஏற்படுத்தியுள்ளது. பீகாரின் லகிசராய் (Lakhisarai) மாவட்டத்தில் உள்ள பல்வேறு தேர்வு மையங்களில் நடத்தப்பட்ட அதிரடிச் சோதனையில் போலி தேர்வர்கள் உட்பட மொத்தம் 30 பேர் கைது செய்யப்பட்டுள்ளனர்.

கைது செய்யப்பட்டவர்களில் பெரும்பாலானோர் மெடிக்கல் காலேஜ் மற்றும் ஐஐடி போன்ற முன்னணி கல்வி நிறுவனங்களில் படித்து வரும் மூத்த மருத்துவ மாணவர்கள் (MBBS Students) மற்றும் இளம் மருத்துவர்கள் என்பது விசாரணையில் தெரியவந்துள்ளது. இவ்வளவு திட்டமிட்டு நடத்தப்பட்ட இந்த ஆள்மாறாட்ட மோசடி, தேர்வு மையங்களில் சிக்கியது எப்படி என்பது குறித்த பரபரப்பு பின்னணி விவரங்கள் இதோ:

1. அதிநவீன பயோமெட்ரிக் மற்றும் முக அடையாளச் சோதனை

தேசியத் தேர்வு முகமை (NTA) இந்த முறை தேர்வு முறைகேடுகளைத் தவிர்க்கக் கடுமையான பாதுகாப்பு ஏற்பாடுகளைச் செய்திருந்தது. தேர்வு எழுத வந்த நபர்களின் விரல் ரேகை (Fingerprint) மற்றும் முக அடையாளங்கள் (Facial Recognition) அசல் விண்ணப்பதாரரின் தரவுகளுடன் டிஜிட்டல் முறையில் ஒப்பிட்டுப் பார்க்கப்பட்டன. இந்த நவீன பயோமெட்ரிக் சரிபார்ப்பின் போது, பல போலி தேர்வர்களின் விவரங்கள் அசல் விண்ணப்பத்தோடு பொருந்தாமல் போனதால் அவர்கள் கச்சிதமாகக் கண்டறியப்பட்டனர்.

2. அட்மிட் கார்டு புகைப்பட குளறுபடிகள்

அசல் மாணவர்களின் புகைப்படங்களைச் சற்றே கணினி மூலம் திருத்தி (Photo Morphing), தேர்வு எழுத வரும் மருத்துவர்களின் முக அமைப்போடு ஓரளவிற்கு ஒத்துப்போகுமாறு அட்மிட் கார்டில் ஒட்டியிருந்தனர். இருப்பினும், தேர்வு மைய அதிகாரிகள் அட்மிட் கார்டில் உள்ள புகைப்படத்தையும், நேரில் வந்திருந்த நபரின் முகத்தையும் தீவிரமாக ஒப்பிட்டுப் பார்த்த போது ஆள்மாறாட்டம் முழுமையாக அம்பலமானது.

3. லட்சக்கணக்கில் பேரம் பேசிய ‘சால்வர் கேங்’

ஒரு மாணவருக்காகப் பதிலாகத் தேர்வு எழுத ₹5 லட்சம் முதல் ₹25 லட்சம் வரை அசல் மாணவர்களின் பெற்றோர்களிடம் இந்த மோசடி நெட்வொர்க் (Solver Gang) பேரம் பேசியுள்ளது. கே.ஆர்.கே மேல்நிலைப்பள்ளி, கேந்திரிய வித்யாலயா மற்றும் ஹசன்பூர் பள்ளி ஆகிய மையங்களில் நடத்தப்பட்ட அதிரடி சோதனைகளில் 9 போலி தேர்வர்கள் கையும் களவுமாகப் பிடிபட்டனர். இவர்களுடன் தொடர்புடைய மேலும் 21 இடைத்தரகர்களும் கைது செய்யப்பட்டுள்ளனர்.

எஸ்டிஎம் பிரபாகர் குமார் மற்றும் எஸ்டிபிஓ சிவம் குமார் ஆகியோரின் மேற்பார்வையில், கைதான மருத்துவ மாணவர்கள் மற்றும் மருத்துவர்களிடம் போலீஸார் தொடர்ந்து தீவிர விசாரணை நடத்தி வருகின்றனர். இதன் பின்னணியில் உள்ள முக்கியப் புள்ளிகளைக் கைது செய்யத் தனிப்படை அமைக்கப்பட்டுத் தீவிர தேடுதல் வேட்டை முடுக்கிவிடப்பட்டுள்ளது.