சென்னை: மேகதாது அணை விவகாரத்தில் தமிழகத்தின் உரிமைகளை நிலைநாட்டுவது மற்றும் அடுத்தகட்ட சட்டப் போராட்டங்கள் குறித்து, தமிழக முதல்வர் விஜய் அமைச்சர்களுடன் அவசர ஆலோசனை மேற்கொண்டுள்ளார்.
டி.கே.சிவக்குமாரின் சர்ச்சை பேச்சு:
கர்நாடக அரசு மேகதாது பகுதியில் புதிய அணை கட்டுவதற்கான பணிகளில் தீவிர ஆர்வம் காட்டி வருகிறது. இதற்குத் தமிழக அரசு தொடர்ந்து கடும் எதிர்ப்பைத் தெரிவித்து வருகிறது. இந்நிலையில், “மேகதாது அணை கட்டுவதற்கு எதிர்ப்பு தெரிவிக்கத் தமிழக அரசுக்கு எந்தவித உரிமையும் இல்லை” என கர்நாடக துணை முதல்வர் டி.கே.சிவக்குமார் அண்மையில் கருத்து தெரிவித்திருந்தார். இது தமிழக அரசியல் வட்டாரத்தில் பெரும் கொந்தளிப்பை ஏற்படுத்தியது.
முதல்வர் நடத்திய அவசரக் கூட்டம்:
டி.கே.சிவக்குமாரின் இந்தச் சர்ச்சைக்குரிய பேச்சுக்குத் தமிழகத் தரப்பில் இருந்து வலுவான பதிலடி கொடுப்பது குறித்தும், உச்ச நீதிமன்றத்தில் நிலுவையில் உள்ள வழக்குகளை எதிர்கொள்வது குறித்தும் சென்னை தலைமைச் செயலகத்தில் அவசர ஆலோசனைக் கூட்டம் நடைபெற்றது.
முதல்வர் விஜய் தலைமையில் நடைபெற்ற இக்கூட்டத்தில், முக்கிய அமைச்சர்களான ஆனந்த், ஆதவ் அர்ஜுனா மற்றும் நீர்வளத்துறை அதிகாரிகள், சட்ட வல்லுநர்கள் கலந்து கொண்டனர்.
தமிழக அரசின் அடுத்தகட்ட நகர்வு:
இந்த ஆலோசனையின் போது, காவேரி நடுவர் மன்றத் தீர்ப்பின்படி தமிழகத்திற்கு கிடைக்க வேண்டிய தண்ணீரின் அளவை உறுதி செய்வது மற்றும் மேகதாதுவில் கர்நாடகா ஒருபோதும் அணை கட்ட முடியாதபடி சட்ட ரீதியான முட்டுக்கட்டைகளைப் பலப்படுத்துவது குறித்து விவாதிக்கப்பட்டது. தமிழக மக்களின் வாழ்வாதாரமான காவேரி நீர் உரிமையில் எந்தவொரு சூழலிலும் சமரசம் செய்து கொள்ளக் கூடாது என்பதில் முதல்வர் விஜய் உறுதியாக இருப்பதாகக் கூட்டத்திற்குப் பின் தகவல்கள் வெளியாகியுள்ளன.
