சென்னை: தமிழகத்தின் மின்சாரக் கட்டமைப்பை நவீனப்படுத்தவும், சீரான மின் விநியோகத்தை உறுதி செய்யவும் ரூ.15,032 கோடி மதிப்பீட்டில் 231 புதிய துணை மின் நிலையங்களை அமைக்க முதலமைச்சர் சி. ஜோசப் விஜய் உத்தரவிட்டுள்ளார்.
இது தொடர்பாக அரசு வெளியிட்டுள்ள அதிகாரப்பூர்வத் தகவலின்படி, மாநிலம் முழுவதும் மின் விநியோகக் குறைபாடுகளைக் களைந்து, உள்கட்டமைப்பை வலுப்படுத்தும் நோக்கில் இந்த மாபெரும் திட்டம் செயல்படுத்தப்பட உள்ளது. தற்போது முதற்கட்டமாக, தமிழகம் முழுவதும் ரூ.10,109 கோடி செலவில் 121 புதிய மற்றும் தரம் உயர்த்தப்பட்ட துணை மின் நிலையங்களை அமைக்கும் பணிகள் தீவிரமாக நடைபெற்று வருகின்றன.
15,000-க்கும் மேற்பட்ட புதிய பணியாளர்கள் நியமனம்: மின்சாரப் பழுதுகள் மற்றும் விநியோகத் தடைகளை உடனுக்குடன் சரிசெய்வதற்காக, கூடுதலாக 15,058 புதிய களப் பணியாளர்களை நியமிக்கவும் முதலமைச்சர் உத்தரவிட்டுள்ளார். மின் வாரியப் பணியாளர்கள் தொடர்ந்து ரோந்துப் பணிகளில் ஈடுபட்டு, மின் வழித்தடங்களைக் கண்காணிக்க அறிவுறுத்தப்பட்டுள்ளது.
கூடுதல் உள்கட்டமைப்பு மற்றும் அவசர உதவிகள்:
- புதிய மையங்கள்: பொதுமக்கள் சந்திக்கும் மின்தடைகளை உடனுக்குடன் போக்க 77 புதிய மின்தடை நீக்க மையங்கள் மற்றும் 7 கூடுதல் மின்பழுது நீக்கும் சிறப்புக் குழுக்கள் அமைக்கப்பட்டுள்ளன.
- கள வாகனங்கள்: பழுதுகளை விரைந்து சரிசெய்ய 125 பிரத்யேக வாகனங்களும், நிலத்தடி கேபிள்களில் ஏற்படும் பழுதுகளைக் கண்டறிய 2 அதிநவீன கண்டறியும் குழுக்களும் செயல்பாட்டிற்கு வந்துள்ளன.
- மேற்பார்வை: ஒட்டுமொத்த மின் திட்டங்களையும், புகார்களையும் கண்காணிக்க 10 உயர்மட்டக் கண்காணிப்புக் குழுக்கள் களமிறக்கப்பட்டுள்ளன.
மின் நுகர்வோரின் புகார்களுக்கு மிகக் குறுகிய காலத்தில், போர்க்கால அடிப்படையில் தீர்வு காண மின்சார வாரியத்திற்கு முதலமைச்சர் விஜய் உத்தரவிட்டுள்ளார். இந்த புதிய துணை மின் நிலையங்கள் பயன்பாட்டிற்கு வரும்போது, தமிழகத்தில் குறைந்தழுத்த மின்சாரப் பிரச்சினை முழுமையாகத் தவிர்க்கப்படும் என எதிர்பார்க்கப்படுகிறது.
