“பிரதமரின் முடிவை எதிர்த்து கேபினட் அமைச்சரால் வாக்களிக்க முடியுமா?” – தேர்தல் ஆணையர் நியமன சட்டத்தை சாடிய உச்ச நீதிமன்றம்!

புதுடெல்லி: தலைமைத் தேர்தல் ஆணையர் (CEC) மற்றும் தேர்தல் ஆணையர்களை (ECs) தேர்வு செய்யும் குழுவில், உச்ச நீதிமன்றத் தலைமை நீதிபதிக்கு (CJI) பதிலாக மத்திய கேபினட் அமைச்சர் ஒருவரைச் சேர்த்த ஒன்றிய அரசின் 2023ஆம் ஆண்டு சட்டத்திற்கு எதிராகத் தாக்கல் செய்யப்பட்ட மனுக்களை விசாரித்த உச்ச நீதிமன்றம், கடுமையான கேள்விகளை எழுப்பியுள்ளது.

நீதிபதிகள் தீபங்கர் தத்தா மற்றும் சதீஷ் சந்திர சர்மா ஆகியோர் அடங்கிய அமர்வு இந்த வழக்கினை விசாரித்து, ஒன்றிய அரசுக்குக் கடுமையான கண்டனங்களைத் தெரிவித்தது.

உச்ச நீதிமன்றத்தின் முக்கிய வாதங்கள் மற்றும் பின்னணி விபரங்கள்:

உச்ச நீதிமன்றம் எழுப்பிய கேள்விகள்:

• சுதந்திரத்தன்மை வெறும் கண் துடைப்பா?: தேர்தல் ஆணையம் போன்ற ஒரு தன்னாட்சி அமைப்பின் தலைவர்களைத் தேர்ந்தெடுக்கும் போது, அது நடுநிலையாக இருப்பது மட்டும் போதாது, பொதுமக்களின் பார்வையில் அது நடுநிலையானதாகத் தோற்றமளிக்க வேண்டும். ஆனால், இப்போதைய குழுவின் கட்டமைப்பு “சுதந்திரத்தன்மையைக் கண் துடைப்பாக” காட்டுவது போல் உள்ளது என நீதிபதிகள் விமர்சித்தனர்.
• அமைச்சரால் எதிர்க்க முடியுமா?: “ஆளும் கட்சிக்கு 300 எம்பிக்கள் இருக்கிறார்கள் என்று வைத்துக் கொள்வோம். அதில் சிறந்த 25 பேரைத் தேர்ந்தெடுத்து பிரதமர் அமைச்சராக்குகிறார். அந்த 25 பேரில் ஒருவரைத் தூக்கி இந்தத் தேர்வுக் குழுவில் வைத்தால், பிரதமரின் முடிவை எதிர்த்து அந்த கேபினட் அமைச்சரால் வாக்களிக்க முடியுமா?” என்று நீதிபதிகள் கேள்வி எழுப்பினர்.
• எதிர்க்கட்சித் தலைவர் அலங்காரப் பொம்மையா?: இக்குழுவில் பிரதமர் மற்றும் கேபினட் அமைச்சர் என இருவர் இருக்கும் போது, எப்போதுமே முடிவு 2:1 என்ற பெரும்பான்மை அடிப்படையிலேயே ஆளும் கட்சிக்கு ஆதரவாக அமையும். அப்படியிருக்கும் போது, குழுவில் உள்ள எதிர்க்கட்சித் தலைவரின் பங்கு வெறும் அலங்காரப் பொம்மையாகவே (Ornamental) மாறும் என்றும் நீதிமன்றம் சுட்டிக்காட்டியது.
• சிபிஐ இயக்குநருக்கு இருக்கும் முக்கியத்துவம் இதற்கு இல்லையா?: சிபிஐ (CBI) இயக்குநரைத் தேர்வு செய்யும் குழுவில் உச்ச நீதிமன்றத் தலைமை நீதிபதி இருக்கும் போது, நாட்டின் ஜனநாயகத்திற்கும், தூய்மையான தேர்தல் முறைக்கும் அடிப்படையாக விளங்கும் தேர்தல் ஆணையர்களைத் தேர்வு செய்யும் குழுவில் ஏன் ஒரு நடுநிலையான நபர் (CJI) இருக்கக் கூடாது? என்றும் நீதிமன்றம் கேள்வி எழுப்பியது.

வழக்கின் பின்னணி என்ன?

கடந்த 2023ஆம் ஆண்டு மார்ச் மாதம் உச்ச நீதிமன்றத்தின் அரசியல் சாசன அமர்வு, ‘அனூப் பரன்வால் எதிர் இந்திய ஒன்றியம்’ வழக்கில், தேர்தல் ஆணையர்களைத் தேர்ந்தெடுக்கும் குழுவில் பிரதமர், மக்களவை எதிர்க்கட்சித் தலைவர் மற்றும் உச்ச நீதிமன்றத் தலைமை நீதிபதி (CJI) ஆகிய மூவரும் இடம் பெற வேண்டும் என்று தீர்ப்பளித்தது.

ஆனால், இந்தத் தீர்ப்பு வெளியான சில மாதங்களிலேயே, ஒன்றிய அரசு நாடாளுமன்றத்தில் புதிய சட்டம் (Chief Election Commissioner and Other Election Commissioners Act, 2023) ஒன்றைக் கொண்டு வந்தது. அதன்படி, குழுவில் இருந்து உச்ச நீதிமன்றத் தலைமை நீதிபதி நீக்கப்பட்டு, அவருக்குப் பதிலாக பிரதமரால் பரிந்துரைக்கப்படும் ஒரு மத்திய கேபினட் அமைச்சர் சேர்க்கப்பட்டார். இதன் மூலம் தேர்வுக் குழுவில் ஆளும் தரப்பின் கையே ஓங்கியிருக்கும்படி சட்டம் மாற்றப்பட்டது.

இந்தச் சட்டத்தின் அரசியலமைப்புச் செல்லுபடித்தன்மையை எதிர்த்துத் தாக்கல் செய்யப்பட்ட மனுக்களின் மீதே, உச்ச நீதிமன்றம் தற்போது ஒன்றிய அரசிடம் இந்த அடுக்கடுக்கான கேள்விகளை முன்வைத்துள்ளது.