சேலம்: நீட் தேர்வு அச்சம் காரணமாக சேலம் மாவட்டத்தைச் சேர்ந்த மாணவி ஒருவர் தற்கொலை செய்து கொண்ட சம்பவம் தமிழகம் முழுவதும் பெரும் அதிர்ச்சியை ஏற்படுத்தியுள்ளது. இச்சம்பவத்திற்கு இரங்கல் தெரிவித்துள்ள தமிழக சட்டமன்ற எதிர்க்கட்சித் தலைவர் உதயநிதி ஸ்டாலின், நீட் ஒழிப்பிற்கான சட்டப் போராட்டத்தை தற்போதைய த.வெ.க அரசு சமரசமின்றி தொடர வேண்டும் என்று கோரிக்கை விடுத்துள்ளார்.
உயிரைக் குடித்த நீட் அச்சம்: சேலம் மாவட்டம் எடப்பாடி அடுத்த கொங்கணாபுரம் ஒன்றியம், வெள்ளாளபுரம் கிராமத்தைச் சேர்ந்த சேகர் – புவனேஷ்வரி தம்பதியினரின் மகள் கோபிகா (19). மருத்துவப் படிப்பின் மீது ஆர்வம் கொண்ட இவர், நீட் தேர்வுக்காகத் தீவிரமாகத் தயாராகி வந்தார். வினாத்தாள் கசிவு உள்ளிட்ட பல்வேறு சர்ச்சைகளுக்கு மத்தியில் நீட் மறுதேர்வு குறித்த அறிவிப்புகள் வெளியான நிலையில், கடந்த சில நாட்களாக கடும் மன உளைச்சலிலும், தேர்வு குறித்த பயத்திலும் கோபிகா இருந்து வந்ததாகக் கூறப்படுகிறது. இந்த நிலையில், தேர்வு பயம் காரணமாக மாணவி கோபிகா தனது வீட்டில் தற்கொலை செய்து கொண்டார்.
உதயநிதி ஸ்டாலின் கண்டனம் & கோரிக்கை: மாணவியின் மறைவுக்கு ஆழ்ந்த இரங்கலைத் தெரிவித்துள்ள எதிர்க்கட்சித் தலைவர் உதயநிதி ஸ்டாலின் தனது எக்ஸ் (X) தளப் பக்கத்தில் அறிக்கை ஒன்றை வெளியிட்டுள்ளார். அதில் அவர் குறிப்பிட்டிருப்பதாவது:
“நீட் தேர்வுக்கு தயாராகி வந்த சேலம் மாவட்டத்தைச் சேர்ந்த தங்கை கோபிகா, தேர்வு அச்சத்தில் தற்கொலை செய்து கொண்ட சம்பவம் அறிந்து அதிர்ச்சியும் வேதனையும் அடைந்தேன். எப்படியும் டாக்டராகிவிடுவார் என்று ஆசை ஆசையாய் வளர்த்த அன்பு மகளை, நீட் அரக்கனிடம் பலி கொடுத்து தவிக்கும் கோபிகாவின் பெற்றோருக்கு என் ஆறுதலையும் இரங்கலையும் தெரிவித்துக் கொள்கிறேன்.
தகுதி என்று சொல்லி திணிக்கப்பட்ட நீட் தேர்வு, தற்போது வினாத்தாள் கசிவு (Question Paper Leak), ஆள்மாறாட்டம், பயிற்சி மையக் கொள்ளை, அச்சுறுத்தும் சோதனை முறைகள் என மாபெரும் உயிர்கொல்லும் மோசடியாக (Scam) மாறியிருக்கிறது. இந்த மோசடியான நீட் தேர்வை ஒன்றிய அரசு உடனடியாக ஒழித்தே ஆக வேண்டும்.
முந்தைய திராவிட மாடல் அரசு, நீட் ஒழிப்பிற்காகத் தொடங்கிய உறுதியான நடவடிக்கைகளையும், சட்டப் போராட்டத்தையும் தற்போதைய த.வெ.க அரசு எவ்வித சமரசமும் இன்றித் தொடர்ந்திட வேண்டும் என்று கேட்டுக்கொள்கிறேன்.”
மேலும், நீட் தேர்வுக்குத் தயாராகும் மாணவ, மாணவிகள் யாரும் எக்ஸாம் ஸ்ட்ரெஸ் (Exam Stress) காரணமாகத் தவறான முடிவுகளை எடுக்க வேண்டாம் என்றும், தன்னம்பிக்கையுடன் இந்தச் சூழலை எதிர்கொள்ள வேண்டும் என்றும் அவர் தனது அறிக்கையில் உருக்கமாகக் கேட்டுக்கொண்டுள்ளார்.
