சென்னை: அதிமுக தலைமை மீது நிலவி வந்த அதிருப்தி காரணமாக, விராலிமலை தொகுதி சட்டமன்ற உறுப்பினரும், முன்னாள் சுகாதாரத்துறை அமைச்சருமான சி.விஜயபாஸ்கர் இன்று தனது எம்.எல்.ஏ. பதவியை அதிரடியாக ராஜினாமா செய்துள்ளார். இதன் மூலம் தமிழ்நாட்டில் இடைத்தேர்தல் நடைபெற உள்ள சட்டமன்றத் தொகுதிகளின் எண்ணிக்கை 6-ஆக உயர்ந்துள்ளது.
சென்னை தலைமைச் செயலகத்தில் இன்று பிற்பகல் சட்டமன்ற சபாநாயகர் ஜே.சி.டி.பிரபாகரை நேரில் சந்தித்த சி.விஜயபாஸ்கர், தனது ராஜினாமா கடிதத்தை வழங்கினார். அவரது ராஜினாமாவை சபாநாயகர் உடனடியாக ஏற்றுக்கொண்டு அதிகாரப்பூர்வமாக அறிவித்துள்ளார்.
சமீபத்தில் நடைபெற்ற சட்டப்பேரவை நம்பிக்கை வாக்கெடுப்பின் போது, அதிமுக கொறடாவின் உத்தரவை மீறி தமிழக வெற்றிக் கழக (தவெக) அரசுக்கு ஆதரவாக வாக்களித்த அதிருப்தி எம்.எல்.ஏ-க்களில் சி.விஜயபாஸ்கரும் ஒருவராவார். இதன் காரணமாக அவரது கட்சிப் பதவிகள் பறிக்கப்பட்ட நிலையில், எடப்பாடி பழனிசாமி தலைமையிலான அதிமுகவிலிருந்து முழுமையாக விலகும் நோக்கில் தற்போது இந்த ராஜினாமா முடிவை அவர் எடுத்துள்ளார்.
சரிந்தது அதிமுகவின் பலம்; உயரும் காலித் தொகுதிகள்: ஏற்கனவே அதிமுகவைச் சேர்ந்த இசக்கி சுப்பையா (அம்பாசமுத்திரம்), சத்யபாமா (தாராபுரம்), மரகதம் குமரவேல் (மதுராந்தகம்) மற்றும் ஜெயக்குமார் (பெருந்துறை) ஆகிய 4 எம்.எல்.ஏ-க்கள் தங்களது பதவிகளை ராஜினாமா செய்துவிட்டு தவெகவில் இணைந்துள்ளனர். தற்போது 5-வது நபராக சி.விஜயபாஸ்கரும் விலகியுள்ளதால், சட்டப்பேரவையில் அதிமுகவின் பலம் 42-ஆகக் குறைந்துள்ளது.
இதற்கிடையே, தமிழ்நாட்டில் ஏற்கனவே 5 சட்டமன்றத் தொகுதிகள் காலியாக இருப்பதாக அறிவிக்கப்பட்டிருந்த நிலையில், தற்போது சி.விஜயபாஸ்கரின் விலகலால் விராலிமலை தொகுதியும் காலியாகியுள்ளது. இதன் காரணமாக, தமிழகத்தில் இடைத்தேர்தல் சந்திக்கவிருக்கும் தொகுதிகளின் மொத்த எண்ணிக்கை 6-ஆக அதிகரித்துள்ளது.
பதவியை ராஜினாமா செய்துள்ள சி.விஜயபாஸ்கர், இன்னும் ஓரிரு நாட்களில் முதலமைச்சர் விஜய் முன்னிலையில் தவெகவில் அதிகாரப்பூர்வமாக இணைய உள்ளதாக அவருக்கு நெருக்கமான வட்டாரங்கள் தெரிவிக்கின்றன. மேலும், கரூரைச் சேர்ந்த முன்னாள் அமைச்சர் எம்.ஆர்.விஜயபாஸ்கரும் விரைவில் ராஜினாமா செய்யக்கூடும் என அரசியல் வட்டாரத்தில் பரவலாகப் பேசப்பட்டு வருவதால், தமிழக அரசியல் களம் தற்போதைய சூழலில் பெரும் பரபரப்பான கட்டத்தை எட்டியுள்ளது.
