ருத்ரபிரயாக் (உத்தரகாண்ட்):
உந்தரகாண்ட் மாநிலம் ருத்ரபிரயாக் மாவட்டத்தில் பெய்த கனமழையால் ஏற்பட்ட நிலச்சரிவில் சிக்கியிருந்த 10,450 கேதார்நாத் யாத்திரை பக்தர்களை மீட்புப் படையினர் பாதுகாப்பாக மீட்டுள்ளனர்.
உத்தரகாண்ட் மாநிலத்தில் கடந்த சில நாட்களாகப் பரவலாகக் கனமழை பெய்து வருகிறது. இதன் காரணமாக, கேதார்நாத் யாத்திரை பாதையில் ஆங்காங்கே நிலச்சரிவுகள் ஏற்பட்டு வருகின்றன.
கூட்டு மீட்புப் படை அதிரடி:
இந்நிலையில், கடுமையான நிலச்சரிவு மற்றும் பாறைகள் உருண்டு விழுந்ததில் ஆயிரக்கணக்கான பக்தர்கள் வழிநெடுகிலும் ஆங்காங்கே சிக்கித் தவித்தனர். இதையடுத்து, தேசிய பேரிடர் மீட்புப் படையும் (NDRF), மாநில பேரிடர் மீட்புப் படையும் (SDRF) இணைந்து கூட்டு அதிரடி மீட்புப் பணியில் இறங்கின.
மோசமான வானிலையையும் பொருட்படுத்தாமல், நவீன உபகரணங்களின் உதவியோடு மீட்புப் படையினர் தீவிரமாகச் செயல்பட்டு, நிலச்சரிவில் சிக்கியிருந்த 10,450 பக்தர்களைப் பத்திரமாக மீட்டுப் பாதுகாப்பான இடங்களுக்கு அழைத்துச் சென்றனர்.
சாலைகள் சீரமைப்பு – போக்குவரத்து தொடக்கம்:
நிலச்சரிவு காரணமாக சோன்பிரயாக் – கௌரிகுண்ட் இடையேயான முக்கியச் சாலையில் இடிபாடுகள் குவிந்து போக்குவரத்து முற்றிலும் துண்டிக்கப்பட்டது. இதனால் யாத்திரை தற்காலிகமாகப் பாதிக்கப்பட்டது.
பக்தர்கள் மீட்கப்பட்டதைத் தொடர்ந்து, போர்க்கால அடிப்படையில் பாதையில் இருந்த பாறாங்கற்கள் மற்றும் மண் சரிவுகள் அகற்றப்பட்டன. சாலை முற்றிலும் சீரமைக்கப்பட்டதைத் தொடர்ந்து, அப்பகுதியில் போக்குவரத்து மீண்டும் தொடங்கப்பட்டு யாத்திரை இயல்பு நிலைக்குத் திரும்பியுள்ளது. எனினும், பக்தர்கள் வானிலை நிலவரத்தைக் கண்காணித்து எச்சரிக்கையுடன் பயணிக்குமாறு மாவட்ட நிர்வாகம் அறிவுறுத்தியுள்ளது.
