காசா சிட்டி:
ஏற்கனவே அறிவிக்கப்பட்ட போர்நிறுத்த ஒப்பந்த மீறல்களுக்கு மத்தியில், காசாவில் உள்ள இறுதிச் சடங்கு ஊர்வலம் ஒன்றின் மீது இஸ்ரேல் இராணுவம் நடத்திய வான்வழி ட்ரோன் தாக்குதலில் 14 பேர் உயிரிழந்துள்ளனர். மேலும், 20-க்கும் மேற்பட்ட பொதுமக்கள் படுகாயமடைந்து உயிருக்கு ஆபத்தான நிலையில் மருத்துவமனையில் அனுமதிக்கப்பட்டுள்ளனர்.
மசூதிக்கு வெளியே நிகழ்ந்த கொடூரம்
மத்திய காசாவின் நுசிரத் (Nuseirat) அகதிகள் முகாம் பகுதியில் உள்ள அல்-பலாட்டா சந்தைக்கு அருகில் இந்தத் தாக்குதல் அரங்கேறியுள்ளது. முன்னதாக இஸ்ரேல் நடத்திய தாக்குதலில் உயிரிழந்த ஒரு பாலஸ்தீனியரின் உடலுக்கு இறுதி அஞ்சலி செலுத்துவதற்காக, அகமது யாசின் மசூதிக்கு வெளியே நூற்றுக்கணக்கான பொதுமக்கள் திரண்டிருந்தனர்.
அவர்கள் மசூதியிலிருந்து வெளியே வந்து இறுதிச் சடங்கு ஊர்வலத்தைத் தொடங்கத் தயாரான அந்தப் பதற்றமான தருணத்தில், திடீரென வந்த இஸ்ரேலிய ட்ரோன் (ஆளில்லா விமானம்) கூட்டத்தின் மீது குண்டுகளை வீசித் தாக்குதல் நடத்தியது.
இரத்த வெள்ளத்தில் சரிந்த பொதுமக்கள்
இந்தத் தாக்குதலில் சம்பவ இடத்திலேயே பலர் உடல் சிதறி பலியாகினர். படுகாயமடைந்த 20-க்கும் மேற்பட்டோர் மீட்கப்பட்டு அருகில் உள்ள அல்-அவ்தா (Al-Awda) மருத்துவமனைக்குக் கொண்டு செல்லப்பட்டனர். மருத்துவமனை நிர்வாகம் வெளியிட்டுள்ள அறிக்கையின்படி, காயமடைந்தவர்களில் பலரது நிலைமை கவலைக்கிடமாக இருப்பதால், பலி எண்ணிக்கை மேலும் உயரக்கூடும் என அஞ்சப்படுகிறது.
இஸ்ரேல் ராணுவம் விளக்கம்
மறுபுறம், இந்தத் தாக்குதல் குறித்து விளக்கம் அளித்துள்ள இஸ்ரேல் இராணுவம், காசாவில் செயல்பட்டு வரும் இஸ்லாமிய ஜிஹாத் (Islamic Jihad) ஆயுதக் குழுவின் இலக்குகளைக் குறிவைத்தே இந்தத் தாக்குதல் நடத்தப்பட்டதாகத் தெரிவித்துள்ளது. எனினும், இந்தத் தாக்குதலில் அப்பாவிப் பொதுமக்கள் மற்றும் இறுதிச் சடங்கில் பங்கேற்றவர்கள் பாதிக்கப்பட்டுள்ளது குறித்து விசாரித்து வருவதாகவும் அவர்கள் குறிப்பிட்டுள்ளனர்.
போர்நிறுத்த ஒப்பந்தங்கள் அமலில் இருப்பதாகக் கூறப்படும் நிலையிலும், சந்தைகள் மற்றும் இறுதிச் சடங்கு கூட்டங்கள் போன்ற பொதுமக்கள் கூடும் இடங்களைக் குறிவைத்து இஸ்ரேல் தொடர்ந்து தாக்குதல் நடத்தி வருவதாக காசா செய்தி ஊடகப் பிரிவு கடும் கண்டனம் தெரிவித்துள்ளது.
