மும்பை: உலகப் புகழ்பெற்ற ஹாலிவுட் இயக்குநர் கிறிஸ்டோபர் நோலன், தனது பிரம்மாண்ட புதிய திரைப்படமான ‘தி ஒடிசி’ (The Odyssey) படத்தின் அதிகாரப்பூர்வ இந்தியப் பிரீமியர் காட்சிக்காக முதன்முறையாக இந்தியா வரவுள்ளார். அவருடன் முன்னணி ஹாலிவுட் நட்சத்திரங்களான மேட் டாமன் மற்றும் ‘ஸ்பைடர் மேன்’ புகழ் டாம் ஹாலண்ட் ஆகியோரும் மும்பை வரவிருப்பது உலக சினிமா ரசிகர்களிடையே பெரும் பரபரப்பை ஏற்படுத்தியுள்ளது.
இந்தியாவின் முதல் நோலன் பிரீமியர் ஷோ
கிறிஸ்டோபர் நோலனின் முந்தைய படங்களான ‘இன்செப்ஷன்’, ‘இண்டர்ஸ்டெல்லார்’, ‘ஓப்பன்ஹீமர்’ போன்ற படங்கள் இந்தியாவில் பெரும் வசூல் சாதனை படைத்துள்ளன. இருப்பினும், நோலனின் திரைப்படம் ஒன்றிற்கு இந்தியாவில் அதிகாரப்பூர்வ பிரீமியர் காட்சி (Global Premiere) நடத்தப்படுவது இதுவே முதல்முறையாகும். லண்டன், பாரிஸ், நியூயார்க் போன்ற உலகத் தரம் வாய்ந்த நகரங்களின் வரிசையில், யுனிவர்சல் பிக்சர்ஸ் நிறுவனம் இந்த முறை மும்பையையும் தனது உலகளாவிய விளம்பரப் பயணத்தில் (Global Tour) இணைத்துள்ளது.
மும்பையில் உள்ள ‘PVR ஐகான் ஐமேக்ஸ்’ (PVR Icon IMAX) தியேட்டரில் ஜூலை மாதத்தில் இந்தச் சிறப்புக் காட்சி நடைபெற உள்ளது. இதற்காக கிறிஸ்டோபர் நோலன், அவரது மனைவியும் தயாரிப்பாளருமான எம்மா தாமஸ், படத்தின் முதன்மைக் கதாபாத்திரங்களில் நடித்துள்ள மேட் டாமன் மற்றும் டாம் ஹாலண்ட் ஆகியோர் நேரடியாகத் தியேட்டருக்கு வரவுள்ளனர்.
முழுமையாக ஐமேக்ஸ் கேமராவில் உருவான முதல் படம்!
ஹோமரின் புகழ்பெற்ற பண்டைய கிரேக்க காவியத்தை அடிப்படையாகக் கொண்டு, போருக்குப் பின் மன்னர் ஒடிசியஸ் தனது நாட்டிற்குத் திரும்ப மேற்கொள்ளும் 10 ஆண்டு கால ஆபத்தான கடல் பயணத்தை மையமாகக் கொண்டு இப்படம் உருவாகியுள்ளது.
பச்சைத் திரை (Green Screen) மற்றும் கிராபிக்ஸ் காட்சிகளைத் தவிர்த்து, உண்மையான கடலிலும், அலைகளிலும் 91 நாட்கள் ஆபத்தான முறையில் இந்த படம் படமாக்கப்பட்டுள்ளது. உலக சினிமா வரலாற்றிலேயே முழுமையாக புதிய ’70mm ஐமேக்ஸ்’ (IMAX) பிலிம் கேமராக்களைப் பயன்படுத்திப் படமாக்கப்பட்ட முதல் திரைப்படம் என்ற பெருமையையும் ‘தி ஒடிசி’ பெற்றுள்ளது.
உலகளாவிய ரிலீஸ்
மேட் டாமன், டாம் ஹாலண்ட் ஆகியோருடன் அன் ஹாத்வே, ராபர்ட் பாட்டின்சன், லுபிடா நியாங்கோ, ஜெண்டாயா மற்றும் சார்லிஸ் தெரோன் என மிகப்பெரிய நட்சத்திரப் பட்டாளமே இதில் நடித்துள்ளனர். இப்படம் உலகளவில் ஜூலை 17, 2026 அன்று தியேட்டர்களில் வெளியாகவுள்ளது. ஹாலிவுட்டின் உச்சக்கட்ட நட்சத்திரங்கள் மற்றும் நோலனை நேரடியாகப் பார்க்கும் வாய்ப்பு இந்திய ரசிகர்களுக்குக் கிடைத்துள்ளதால், மும்பை பிரீமியர் ஷோவிற்கான எதிர்பார்ப்பு தற்போதே விண்ணைத் தொட்டுள்ளது.
