சென்னை: தமிழ்நாட்டில் எதிர்க்கட்சியைச் சேர்ந்த 4 சட்டமன்ற உறுப்பினர்களை (MLA) ராஜினாமா செய்ய வைத்து, உடனடியாக அவர்களைத் தமிழக வெற்றிக் கழகத்தில் (தவெக) இணைத்துக் கொண்டிருப்பது அப்பட்டமான ஜனநாயக படுகொலை என்று பாட்டாளி மக்கள் கட்சியின் (பாமக) தலைவர் டாக்டர் அன்புமணி ராமதாஸ் கடுமையாகச் சாடியுள்ளார்.
இதுதொடர்பாக அவர் வெளியிட்டுள்ள கண்டன அறிக்கையில், முதலமைச்சர் விஜய் தலைமையிலான தவெக அரசின் இந்த நடவடிக்கைக்குத் தனது வன்மையான எதிர்ப்பைப் பதிவு செய்துள்ளார்.
மக்கள் விருப்பத்திற்கு எதிரான மோசடி:
அன்புமணி ராமதாஸ் வெளியிட்டுள்ள அறிக்கையின் விவரம் பின்வருமாறு:
“தமிழ்நாட்டில் எதிர்க்கட்சியில் உள்ள 4 MLA-க்களைத் தங்களது பதவிகளை ராஜினாமா செய்ய வைத்து, உடனடியாக தவெகவில் இணைத்துக் கொண்டது அப்பட்டமான ஜனநாயக படுகொலை ஆகும். இதனை பாட்டாளி மக்கள் கட்சி சார்பில் வன்மையாகக் கண்டிக்கிறோம்.
மக்களின் வாக்குளைப் பெற்றுத் தேர்ந்தெடுக்கப்பட்ட மக்கள் பிரதிநிதிகளை, வாக்களித்த மக்களின் விருப்பத்திற்கு மாறாக முதலமைச்சர் விஜய் தவெகவில் இணைத்திருப்பது ஒரு மிகப்பெரிய அரசியல் மோசடியாகும். இதனைத் தமிழ்நாட்டு மக்கள் ஒருபோதும் விரும்பவில்லை.”
அரசியல் பரபரப்பு:
தமிழகத்தில் நிலவி வரும் தற்போதைய அரசியல் சூழலில், மாற்றுக்கட்சி சட்டமன்ற உறுப்பினர்கள் தங்களது பதவிகளைத் துறந்து ஆளுங்கட்சியான தவெகவில் இணைந்திருப்பது அரசியல் வட்டாரத்தில் பெரும் விவாதத்தைக் கிளப்பியுள்ளது.
மக்களாட்சி தத்துவத்திற்கும், வாக்களித்த மக்களின் நம்பிக்கைகளுக்கும் துரோகம் விளைவிக்கும் வகையில் இந்த அரசியல் நகர்வுகள் அமைந்துள்ளன என்றும், இதற்குத் தமிழக மக்கள் உரிய நேரத்தில் பாடம் புகட்டுவார்கள் என்றும் அன்புமணி ராமதாஸ் தனது அறிக்கையில் சுட்டிக்காட்டியுள்ளார்.
