சென்னை:
அரசு மற்றும் ஆளுநர் மாளிகை நிகழ்ச்சிகளில் தமிழ்த்தாய் வாழ்த்து மற்றும் வந்தே மாதரம் பாடல்களைப் பாடுவது தொடர்பான புதிய சர்ச்சை எழுந்துள்ள நிலையில், இது குறித்து நீதிமன்றத்தை நாடுவதற்கான சாத்தியக்கூறுகள் குறித்து சட்ட வல்லுநர்களுடன் ஆலோசித்து வருவதாகத் தமிழக அமைச்சர் ஆதவ் அர்ஜுனா தெரிவித்துள்ளார்.
தமிழகத்தில் புதிய அரசு அமைந்துள்ள சூழலில், அரசு மரபு மற்றும் மாநில உரிமைகள் சார்ந்த விவகாரங்களில் ஆளுநர் மாளிகைக்கும் தமிழக அரசுக்கும் இடையே கருத்து வேறுபாடுகள் தலைதூக்கத் தொடங்கியுள்ளன.
அமைச்சர் ஆதவ் அர்ஜுனா விளக்கம்:
இது தொடர்பாகச் செய்தியாளர்களைச் சந்தித்த அமைச்சர் ஆதவ் அர்ஜுனா, மத்திய அரசின் சுற்றறிக்கை மற்றும் ஆளுநரின் நிலைப்பாடு குறித்து விரிவான விளக்கமளித்தார்.
அவர் பேசுகையில்:
“ஆளுநர் தலைமையில் நடைபெறும் அதிகாரப்பூர்வ நிகழ்ச்சிகளில் ‘வந்தே மாதரம்’ பாடல் தான் முதலில் பாடப்பட வேண்டும் என மத்திய உள்துறை அமைச்சகம் சுற்றறிக்கை அனுப்பியுள்ளதாகத் தெரிகிறது. அந்தச் சுற்றறிக்கையின்படி செயல்படுவதில் ஆளுநரும் உறுதியாக இருக்கிறார்.
மத்திய அரசின் இந்த சுற்றறிக்கைக்கு எதிராக நீதிமன்றத்தில் வழக்குத் தொடர முடியுமா? என்பது குறித்து தற்போது நாங்கள் சட்ட வல்லுநர்களுடன் தீவிரமாக ஆலோசனை நடத்தி வருகிறோம்.” என்று கூறினார்.
அரசின் தெளிவான நிலைப்பாடு:
மேலும், மாநில அரசின் நிகழ்ச்சிகள் குறித்துப் பேசிய அமைச்சர், “தமிழக முதலமைச்சர் தலைமையில் நடைபெறும் அனைத்து அரசு நிகழ்ச்சிகளிலும் எப்போதுமே ‘தமிழ்த்தாய் வாழ்த்து’ தான் முதலில் பாடப்படும் என்பதில் எந்த மாற்றமும் இல்லை; அதுவே எங்களின் தெளிவான நிலைப்பாடு” என்றும் ஆணித்தரமாகத் தெரிவித்தார்.
மாநிலத்தின் அடையாளமான தமிழ்த்தாய் வாழ்த்துப் பாடலுக்கு முன்னுரிமை அளிப்பது தொடர்பாகத் தமிழக அரசு நீதிமன்றத்தை நாட ஆலோசித்து வருவது, தமிழக அரசியல் களத்திலும் சமூக ஊடகங்களிலும் தற்போதைய விவாதப் பொருளாக மாறியுள்ளது.
