ரூ.2,000 உரிமைத் தொகை, 50 லட்சம் வேலைவாய்ப்புகள், இலவச பம்ப் செட்: அதிரடி காட்டும் ‘திராவிட மாடல் 2.0’!
2026 சட்டமன்றத் தேர்தலை எதிர்கொள்ளும் விதமாக, 515 வாக்குறுதிகள் அடங்கிய பிரம்மாண்ட தேர்தல் அறிக்கையை திமுக வெளியிட்டுள்ளது. இதில் இல்லத்தரசிகள், மாணவர்கள், விவசாயிகள் மற்றும் இளைஞர்களைக் கவரும் வகையில் பல்வேறு சிறப்புத் திட்டங்கள் அறிவிக்கப்பட்டுள்ளன. “சொன்னதைச் செய்வோம், செய்வதைச் சொல்வோம்” என்ற தாரக மந்திரத்துடன், அடுத்த ஐந்தாண்டுகளில் தமிழகத்தை ஒரு லட்சம் கோடி டாலர் பொருளாதாரமாக மாற்றுவதற்கான இலக்கையும் இந்த அறிக்கை கொண்டுள்ளது.
தேர்தல் அறிக்கையின் 10 முக்கிய அம்சங்கள்:
- மகளிர் உரிமைத் தொகை உயர்வு: கலைஞர் மகளிர் உரிமைத் தொகை மாதந்தோறும் ரூ.1,000-லிருந்து ரூ.2,000 ஆக உயர்த்தப்படும்.
- இல்லத்தரசி கூப்பன் திட்டம்: வருமான வரி செலுத்தாத இல்லத்தரசிகளுக்கு வீட்டு உபயோகப் பொருட்கள் வாங்க ரூ.8,000 மதிப்புள்ள கூப்பன் வழங்கப்படும்.
- முதியோர் ஓய்வூதியம்: முதியோர் மற்றும் கைம்பெண் ஓய்வூதியம் ரூ.2,000 ஆக உயர்த்தப்படும். மாற்றுத்திறனாளிகளுக்கு ரூ.2,500 வழங்கப்படும்.
- காலை உணவுத் திட்டம் விரிவாக்கம்: அரசுப் பள்ளிகளில் 1-ம் வகுப்பு முதல் 8-ம் வகுப்பு வரை காலை உணவுத் திட்டம் விரிவுபடுத்தப்படும்.
- மாணவர்களுக்கான மடிக்கணினி: உயர் கல்வி பயிலும் 35 லட்சம் மாணவர்களுக்கு விலையில்லா மடிக்கணினிகள் வழங்கப்படும்.
- விவசாயிகளுக்கான இலவச மின்சாரம்: 20 லட்சம் விவசாயிகளுக்கு மீட்டர்கள் இல்லாத நவீன மின்சார பம்ப் செட்டுகள் இலவசமாக வழங்கப்படும்.
- வேலைவாய்ப்பு: அடுத்த 5 ஆண்டுகளில் தமிழகத்தில் 50 லட்சம் வேலைவாய்ப்புகள் உருவாக்கப்படும். 1.5 லட்சம் அரசுப் பணியிடங்கள் நிரப்பப்படும்.
- மருத்துவக் காப்பீடு: முதலமைச்சரின் விரிவான மருத்துவக் காப்பீட்டுத் தொகை ரூ.10 லட்சமாக உயர்த்தப்படும் (வருமான வரம்பு ரூ.5 லட்சமாக உயர்வு).
- கலைஞர் கனவு இல்லம்: அடுத்த 5 ஆண்டுகளில் 10 லட்சம் புதிய வீடுகள் கட்டித் தரப்படும்.
- மீனவர் நலன்: மீன்பிடி தடைக்கால நிவாரணம் ரூ.12,000 ஆகவும், இதர கால நிவாரணம் ரூ.9,000 ஆகவும் உயர்த்தப்படும்.
