மத்திய கிழக்கில் போர் மேகங்கள் சூழ்ந்துள்ள நிலையில், ஈரான் அதிபர் மசூத் பெஷேஷ்கியன் (Masoud Pezeshkian) ஒரு எதிர்பாராத மற்றும் மிக முக்கியமான அறிவிப்பை வெளியிட்டுள்ளார். கடந்த சில நாட்களாக அண்டை நாடுகள் மீது நடத்தப்பட்ட ஏவுகணைத் தாக்குதல்களுக்காக அவர் பகிரங்கமாக மன்னிப்புக் கேட்டுள்ளார். அண்டை நாடுகளின் இறையாண்மையை மதிக்கும் வகையில் இந்த மன்னிப்பை அவர் கோரியுள்ளார்.
அதே சமயம் ஒரு முக்கிய நிபந்தனையையும் அவர் முன்வைத்துள்ளார்: “அண்டை நாடுகளின் மண்ணைப் பயன்படுத்தி (அமெரிக்கா அல்லது பிற நாடுகள்) ஈரான் மீது தாக்குதல் நடத்தப்படாமல் இருந்தால், அவர்கள் மீது இனி ஒருபோதும் ஈரான் தாக்குதல் நடத்தாது” என அவர் திட்டவட்டமாகத் தெரிவித்துள்ளார். அமெரிக்காவின் மூன்றாவது விமானம் தாங்கிக் கப்பல் தாக்குதல் குழு இந்தியப் பெருங்கடலுக்கு வந்துள்ள நிலையில், ஈரான் தனது அண்டை நாடுகளுடன் சுமுகமான உறவைப் பேண விரும்புவது ஒரு தற்காப்பு நடவடிக்கையாகப் பார்க்கப்படுகிறது.
பாகிஸ்தான், ஈராக் போன்ற அண்டை நாடுகளுடன் ஏற்கனவே நிலவி வந்த கசப்பான சூழலை மாற்றவும், பிராந்தியத்தில் போர் விரிவடைவதைத் தடுக்கவும் இந்தச் சமாதானத் தூது உதவும் என எதிர்பார்க்கப்படுகிறது. இருப்பினும், அமெரிக்கா தனது தாக்குதலைத் தொடரப்போவதாக அறிவித்துள்ள நிலையில், ஈரானின் இந்த மன்னிப்பு கோரிக்கை சர்வதேச அரங்கில் எத்தகைய மாற்றத்தை ஏற்படுத்தும் என்பதைப் பொறுத்திருந்துதான் பார்க்க வேண்டும்.
