சென்னை:
அறுபடை வீடுகளில் மூன்றாம் படை வீடான பழனி அருள்மிகு தண்டாயுதபாணி சுவாமி திருக்கோயிலுக்குச் சொந்தமான தங்கும் விடுதிகளின் கட்டணத்தை அறநிலையத்துறை கணிசமாக உயர்த்தியுள்ளது. ஏழை மற்றும் நடுத்தர மக்களின் ஆன்மீகப் பயணத்தைப் பாதிக்கும் இந்தத் திடீர் கட்டண உயர்வுக்கு அரசியல் தலைவர்கள் மத்தியில் கடும் எதிர்ப்பு கிளம்பியுள்ளது.
இதுகுறித்து அமமுக பொதுச்செயலாளர் டி.டி.வி. தினகரன் தனது அதிகாரப்பூர்வ சமூக வலைத்தளப் பக்கத்தில் வெளியிட்டுள்ள அறிக்கையில் கூறியிருப்பதாவது:
“பழனி முருகனைத் தரிசிக்கத் தமிழகத்தின் பல்வேறு பகுதிகளில் இருந்தும் தினந்தோறும் பல்லாயிரக்கணக்கான ஏழை, எளிய மற்றும் நடுத்தரப் பக்தர்கள் வருகை தருகின்றனர். இத்தகைய சூழலில், கோயில் நிர்வாகத்திற்குச் சொந்தமான தங்கும் விடுதிகளின் வாடகையை பல மடங்கு உயர்த்தியிருப்பது அதிர்ச்சியளிக்கிறது.
ஆன்மீகப் பயணம் மேற்கொள்ளும் சாதாரண மக்களின் தங்கும் தேவையை வணிக நோக்கமாகப் பார்ப்பது கண்டிக்கத்தக்கது. இந்தக் கட்டண உயர்வு ஏழைப் பக்தர்களின் வயிற்றில் அடிப்பதைப் போன்றதாகும். எனவே, மாண்புமிகு முதலமைச்சர் அவர்கள் இதில் உடனடியாகத் தலையிட்டு, உயர்த்தப்பட்ட தங்கும் விடுதி கட்டணங்களை எவ்வித நிபந்தனையுமின்றி உடனடியாகத் திரும்பப் பெற ஆணையிட வேண்டும்.”
பக்தர்களின் குமுறலும் பின்னணியும்:
பழனி கோயில் நிர்வாகத்தின் கீழ் இயங்கும் தங்கும் விடுதிகளில் ஏசி மற்றும் ஏசி அல்லாத அறைகளின் கட்டணங்கள் கணிசமாக உயர்த்தப்பட்டுள்ளதாகப் புகார்கள் எழுந்துள்ளன. தனியார் விடுதிகளுக்கு இணையாக அரசு விடுதிகளிலும் கட்டணம் உயர்த்தப்பட்டால், தொலைதூர ஊர்களில் இருந்து பாதயாத்திரையாகவும், குடும்பத்தோடும் வரும் சாமானிய மக்கள் எங்கு தங்குவார்கள் என்ற கேள்வியைப் பக்தர்கள் எழுப்பி வருகின்றனர்.
ஏற்கனவே ஆன்லைன் தரிசனக் கட்டணங்கள் மற்றும் இதர சேவைகளுக்கான நடைமுறைகளில் பல்வேறு குளறுபடிகள் இருப்பதாகக் கூறப்படும் நிலையில், இந்த விடுதி கட்டண உயர்வும் சேர்ந்திருப்பது பழனி வரும் பக்தர்களுக்குக் கூடுதல் சுமையாக மாறியுள்ளது. இதனைத் தொடர்ந்து, ஆன்மீக அமைப்புகளும் இந்த முடிவுக்குத் தங்களின் எதிர்ப்பைப் பதிவு செய்து வருகின்றன.
