வைபவ் சூர்யவன்ஷிக்காக இங்கிலாந்து கிரிக்கெட் வாரியம் எடுத்த அதிரடி முடிவு: தனி டிரெஸ்ஸிங் ரூம் ஒதுக்கீடு! பின்னணி என்ன?

லண்டன்: இந்திய கிரிக்கெட்டின் 15 வயது இளம் அதிரடி நட்சத்திரம் வைபவ் சூர்யவன்ஷி (Vaibhav Sooryavanshi), அண்மையில் முடிவடைந்த ஐபிஎல் தொடரில் ராஜஸ்தான் ராயல்ஸ் அணிக்காக அதிக ரன்கள் (776 ரன்கள்) மற்றும் அதிக சிக்ஸர்கள் (65 சிக்ஸர்கள்) விளாசி உலக சாதனை படைத்தார். இதன் காரணமாக அவர் அயர்லாந்து மற்றும் இங்கிலாந்துக்கு எதிரான டி20 தொடருக்கான சீனியர் இந்திய அணியில் தேர்வு செய்யப்பட்டுள்ளார்.

இந்நிலையில், இங்கிலாந்து மற்றும் வேல்ஸ் கிரிக்கெட் வாரியம் (ECB) வைபவ் சூர்யவன்ஷி தொடர்பாக ஒரு முக்கிய அதிரடி உத்தரவைப் பிறப்பித்துள்ளது. இங்கிலாந்து மண்ணில் நடைபெறும் போட்டிகளின் போது, வைபவ் சூர்யவன்ஷி சீனியர் வீரர்களுடன் பொதுவான உடை மாற்றும் அறையை (Changing Room) பகிர்ந்து கொள்ள முடியாது என்றும், அவருக்கு என தனி அறை மற்றும் குளியலறை வசதி செய்து தரப்படும் என்றும் அறிவித்துள்ளது.

இந்த அதிரடி முடிவின் பின்னணி:

இங்கிலாந்து நாட்டின் கடுமையான உள்ளூர் சட்டங்கள் மற்றும் ஐசிசி-யின் (ICC) சிறுவர் பாதுகாப்பு விதிமுறைகளே (Safeguarding Policy) இந்த முடிவுக்குக் காரணம் ஆகும்.

• வயது வரம்பு விதிமுறை: இங்கிலாந்து நாட்டின் ‘பாதுகாப்பான கரங்கள்’ (Safe Hands) கொள்கையின்படி, 16 வயதுக்கு உட்பட்ட சிறுவர்கள் எவரும், வயது வந்த பெரியவர்களுடன் (Adults) ஒரே உடை மாற்றும் அறையையோ அல்லது குளியலறையையோ பகிர்ந்து கொள்ள சட்டம் அனுமதிக்காது.
• போட்டிகளின் போது அனுமதி உண்டு: இந்தத் தடையானது போட்டிகளுக்கு முன்னரும், பின்னரும் வீரர்கள் ஆடை மாற்றும் நேரத்திற்கு மட்டுமே பொருந்தும். போட்டி நடைபெறும் போது டக்-அவுட், இந்திய அணியின் முக்கிய ஆலோசனைக் கூட்டங்கள் மற்றும் டிரெஸ்ஸிங் ரூமில் மற்ற வீரர்களுடன் அமர்ந்து பேச வைபவுக்கு முழு அனுமதி உண்டு.
• பெற்றோருக்கு சிறப்பு அனுமதி: வைபவ் சூர்யவன்ஷி 15 வயது சிறுவன் என்பதால், வழக்கமான கிரிக்கெட் விதிமுறைகளைத் தளர்த்தி, இந்தத் தொடர் முழுவதும் அவரது பெற்றோர்கள் அவருடன் தங்குவதற்கும், பயணிக்கவும் பிசிசிஐ (BCCI) மற்றும் இங்கிலாந்து வாரியம் சிறப்பு அனுமதி வழங்கியுள்ளது.

இங்கிலாந்து கால்பந்து கிளப்பான ஆர்சனல் அணியின் இளம் வீரர் மேக்ஸ் டவுமேனுக்கும் கடந்த ஆண்டு 16 வயது ஆகும் வரை இதே போன்ற தனி அறை விதிகள் பின்பற்றப்பட்டன என்பது குறிப்பிடத்தக்கது.

இந்தியா ஏ அணிக்காக 11 பந்துகளில் அரைசதம் அடித்து மிரட்டிய வைபவ் சூர்யவன்ஷி, அயர்லாந்துக்கு எதிரான போட்டியில் களம் இறங்கும்போது, சர்வதேச கிரிக்கெட்டில் தடம் பதிக்கும் மிக இளம் இந்திய வீரர் என்ற வரலாற்றுச் சாதனையைப் படைக்கவுள்ளார்.