லா பாஸ் (பொலிவியா):
கடந்த 50 நாட்களுக்கும் மேலாக நீடித்து வரும் கடுமையான மக்கள் போராட்டங்கள் மற்றும் பொருளாதார முடக்கத்தை அடுத்து, தென்னமெரிக்க நாடான பொலிவியாவில் அதிபர் ரோட்ரிகோ பாஸ் 90 நாட்களுக்கு அவசரநிலையைப் பிரகடனப்படுத்தியுள்ளார்.
நாடு முழுவதும் போடப்பட்டுள்ள சாலை மறியல்களை அகற்றி, நிலைமையைக் கட்டுக்குள் கொண்டுவர ராணுவ வீரர்களும், புல்டோசர்களும் களமிறக்கப்பட்டுள்ளன.
முடங்கிய முக்கிய நகரங்கள்
பொலிவியாவில் நிலவி வரும் கடுமையான விலைவாசி உயர்வு, எரிபொருள் மற்றும் டாலர் தட்டுப்பாடு காரணமாக அதிபர் ரோட்ரிகோ பாஸ் தலைமையிலான பழமைவாத அரசுக்கு எதிராக விவசாயிகள், பழங்குடியின மக்கள் மற்றும் தொழிலாளர் அமைப்புகள் தொடர் போராட்டங்களில் ஈடுபட்டு வந்தனர்.
நாட்டின் முக்கிய நெடுஞ்சாலைகளில் ஆயிரக்கணக்கான இடங்களில் பாறைகள், மரங்கள் மற்றும் குப்பைகளைக் கொண்டு போராட்டக்காரர்கள் முட்டுக்கட்டை போட்டதால், தலைநகர் லா பாஸ் மற்றும் எல் ஆல்டோ உள்ளிட்ட முக்கிய நகரங்களுக்கு உணவு, மருந்து மற்றும் எரிபொருள் விநியோகம் முற்றிலும் தடைபட்டது. இதனால் நாட்டின் பொருளாதாரம் பில்லியன் கணக்கிலான டாலர்களை இழந்து தவித்தது.
அதிபரின் அதிரடி உரை
சனிக்கிழமை அதிகாலை தொலைக்காட்சியில் தோன்றி நாட்டு மக்களுக்கு உரையாற்றிய அதிபர் ரோட்ரிகோ பாஸ்:
“பொதுமக்கள் தங்களின் அன்றாடப் பணிகளைச் செய்ய முடியாமலும், கல்வி மற்றும் மருத்துவ வசதிகளைப் பெற முடியாமலும் மறியல் செய்பவர்களிடம் பிணைக் கைதிகளாக இருக்க முடியாது. இந்த அவசரநிலை மக்களின் சுதந்திரத்தைப் பறிப்பதற்காக அல்ல, மாறாக அவர்களின் இயல்பு வாழ்க்கையை மீண்டும் மீட்டெடுப்பதற்காகவே கொண்டுவரப்பட்டுள்ளது. சட்டத்தை மீறுபவர்கள் மீது கடும் நடவடிக்கை பாயும்.”
கலவர பூமியான பொலிவியா
அதிபர் பதவி விலகக் கோரி மே மாதம் தொடங்கிய இந்தப் போராட்டம், ஜூன் மாதத்தில் வன்முறையாக வெடித்தது. அதிபர் மாளிகை முற்றுகை, அரசு அமைச்சர்களின் ராஜினாமா எனப் பொலிவியா தற்பொழுது பெரும் அரசியல் நெருக்கடியில் சிக்கியுள்ளது.
அவசரநிலை பிரகடனத்தைத் தொடர்ந்து, எல் ஆல்டோ மற்றும் லா பாஸ் ஆகிய நகரங்களில் ராணுவப் பாதுகாப்பின் கீழ் புல்டோசர்கள் கொண்டு சாலைத் தடைகள் அகற்றப்பட்டு வருகின்றன. சில இடங்களில் மக்கள் இதற்கு ஆதரவு தெரிவித்தாலும், எதிர்க்கட்சிகள் மற்றும் பழங்குடியின அமைப்புகள் தங்களின் போராட்டத்தைத் தொடரப்போவதாக அறிவித்துள்ளதால் அங்கு பதற்றம் மேலும் அதிகரித்துள்ளது.
