பெங்களூரு: தமிழ்நாடு மற்றும் கர்நாடகா இடையே பல ஆண்டுகளாக நீடித்து வரும் காவிரி நதிநீர் பிரச்சினை மற்றும் மேகதாது அணை விவகாரத்தை இருதரப்பு பேச்சுவார்த்தை மூலம் சுமுகமாகத் தீர்க்கத் தாங்கள் தயாராக இருப்பதாகக் கர்நாடக மாநில நீர்வளத்துறை (முக்கிய நீர்ப்பாசனம்) அமைச்சர் ராமலிங்க ரெட்டி தெரிவித்துள்ளார்.
பெங்களூருவில் செய்தியாளர்களைச் சந்தித்த அவர், மேகதாது அணை திட்டத்திற்கு எதிராகத் தமிழ்நாடு சட்டமன்றத்தில் ஒருமனதாக நிறைவேற்றப்பட்ட தீர்மானம் குறித்துக் கருத்துத் தெரிவித்தார்.
அப்போது அமைச்சர் ராமலிங்க ரெட்டி கூறியதாவது:
“காவிரி நடுவர் மன்றம் மற்றும் உச்ச நீதிமன்றத் தீர்ப்பின்படி கர்நாடகாவிற்கு ஒதுக்கப்பட்ட தண்ணீரின் பங்கை மட்டுமே நாங்கள் கேட்கிறோம். தமிழ்நாட்டிற்கு உரிய பங்கிலிருந்து ஒரு சொட்டு நீரைக் கூட கூடுதலாகப் பெற வேண்டும் என்ற எண்ணம் எங்களுக்கு இல்லை. அண்டை மாநிலங்கள் நீதிமன்றங்களுக்குச் சென்று பல ஆண்டுகள் வழக்குகளை இழுத்தடிப்பதை விட, பேச்சுவார்த்தை மூலம் இதுபோன்ற பிரச்சினைகளுக்கு சுமுக தீர்வு காண்பதே சிறந்தது.
மேகதாதுவில் அணை கட்டுவதால் தமிழக விவசாயிகளுக்கு எந்தப் பாதிப்பும் ஏற்படாது; மாறாக, அது அவர்களுக்குப் பயனுள்ளதாகவே இருக்கும். வறட்சி அல்லது போதிய மழையில்லாத காலங்களில், இந்த அணையில் சேமிக்கப்படும் உபரி நீரைக் கொண்டு தமிழ்நாட்டிற்கு உரிய மாதந்திரப் பங்கீட்டு நீரை எங்களால் தடையின்றி திறந்து விட முடியும். மேலும், இந்தத் திட்டம் பெங்களூருவின் குடிநீர் தேவையைத் தீர்க்கவும், 400 மெகாவாட் மின்சாரம் தயாரிக்கவுமே திட்டமிடப்பட்டுள்ளது. பாசனத்திற்காக இந்த நீர் பயன்படுத்தப்படாது.
மேகதாது திட்டத்திற்கு எதிராகத் தமிழ்நாடு தொடர்ந்த வழக்குகளை உச்ச நீதிமன்றம் ஏற்கனவே தள்ளுபடி செய்துள்ளது. இந்தத் திட்டத்திற்கான விரிவான திட்ட அறிக்கையை (DPR) நாங்கள் காவிரி நீர் மேலாண்மை வாரியத்திடம் சமர்ப்பித்துள்ளோம். இத்தருணத்தில், தமிழ்நாடு அரசு முன்வந்தால் இரு மாநிலங்களுக்கு இடையேயான இருதரப்பு பேச்சுவார்த்தைக்குக் கர்நாடக அரசு எப்போதும் தயாராக உள்ளது. எங்கள் முதலமைச்சரும் இதையே தெளிவுபடுத்தியுள்ளார்,” என்று அவர் தெரிவித்தார்.
தமிழ்நாடு சட்டமன்றத்தில் மேகதாதுவிற்கு எதிராகத் தீர்மானம் நிறைவேற்றப்பட்ட மறுநாளே, கர்நாடக நீர்வளத்துறை அமைச்சர் பேச்சுவார்த்தைக்கு அழைப்பு விடுத்துள்ளது காவிரி விவகாரத்தில் அடுத்தகட்ட நகர்வாகப் பார்க்கப்படுகிறது.
