சென்னை: அதிமுகவின் முக்கிய நிர்வாகியும், முன்னாள் சுகாதாரத் துறை அமைச்சருமான சி.விஜயபாஸ்கர் தனது சட்டமன்ற உறுப்பினர் (MLA) பதவியை அதிரடியாக ராஜினாமா செய்துள்ளார். இதனைத் தொடர்ந்து, அவர் பிரதிநிதித்துவப்படுத்திய விராலிமலை சட்டமன்றத் தொகுதி காலியானதாகச் சபாநாயகர் அதிகாரப்பூர்வமாக அறிவித்துள்ளார்.
சென்னை தலைமைச் செயலகத்தில் சபாநாயகர் ஜே.சி.டி.பிரபாகரை நேரில் சந்தித்த சி.விஜயபாஸ்கர், தனது ராஜினாமா கடிதத்தைக் கைப்பட எழுதிக் கொடுத்தார். சட்டமன்ற விதிமுறைகளின்படி அக்கோரிக்கை பரிசீலிக்கப்பட்டு, அவரது ராஜினாமா உடனடியாக ஏற்றுக்கொள்ளப்பட்டதாகச் சபாநாயகர் தரப்பில் தெரிவிக்கப்பட்டுள்ளது. இதன் மூலம் புதுக்கோட்டை மாவட்டத்தின் விராலிமலை தொகுதி தற்போதைய சூழலில் காலியானதாக அறிவிக்கப்பட்டுள்ளது.
அண்மையில் நடைபெற்ற சட்டப்பேரவை நம்பிக்கை வாக்கெடுப்பின் போது, கட்சியின் கொறடா உத்தரவை மீறி அதிருப்தி நிலைப்பாட்டை எடுத்ததாகக் கூறி, சி.விஜயபாஸ்கரின் மாவட்டச் செயலாளர் உள்ளிட்ட கட்சிப் பதவிகள் எடப்பாடி பழனிசாமியால் பறிக்கப்பட்டன. இந்த அரசியல் சூழ்நிலையில், அவர் தனது பதவியை ராஜினாமா செய்துள்ளார். கடந்த ஒரு மாத காலத்தில் பதவி விலகிய 5-வது அதிமுக சட்டமன்ற உறுப்பினர் இவர் என்பது குறிப்பிடத்தக்கது.
தனது ராஜினாமா குறித்து சி.விஜயபாஸ்கர் வெளியிட்ட உருக்கமான அறிக்கையில்:
“அதிமுகவின் தற்போதைய தலைமை எடுக்கும் தவறான முடிவுகளால், நான் என் உயிருக்கு மேலாக நேசித்த இயக்கம் கடுமையான சோதனைகளைச் சந்தித்து வருகிறது. சுயமரியாதையும் உணர்வுகளும் மதிக்கப்படாத இடத்தில் தொடர்ந்து பயணிப்பது சரியாக இருக்காது என்பதால், மிகுந்த மனவேதனையுடன் இந்த முடிவை எடுத்துள்ளேன். நான் விலகுவது ஒரு கட்சியில் இருந்து அல்ல, என் வாழ்க்கையின் மிக முக்கிய அத்தியாயத்தில் இருந்து. இருப்பினும், ஆயுள் உள்ளவரை விராலிமலை தொகுதி மக்களுக்கு நான் விசுவாசமாக இருப்பேன்,” என்று குறிப்பிட்டுள்ளார்.
சி.விஜயபாஸ்கரின் இந்த திடீர் ராஜினாமாவைத் தொடர்ந்து, 234 உறுப்பினர்களைக் கொண்ட தமிழ்நாடு சட்டமன்றத்தில் அதிமுகவின் பலம் 42 ஆகக் குறைந்துள்ளது. தமிழக அரசியலில் நிலவி வரும் இந்த அடுத்தடுத்த எம்.எல்.ஏ-க்களின் ராஜினாமா படலம் பெரும் பரபரப்பை ஏற்படுத்தியுள்ளது.
