கும்மிடிப்பூண்டி: திருவள்ளூர் மாவட்டம் கும்மிடிப்பூண்டியில் சிறுமி பாலியல் வன்கொடுமை செய்யப்பட்டு படுகொலை செய்யப்பட்ட கொடூரச் சம்பவம் குறித்துக் கேள்விப்பட்டு முதலமைச்சர் விஜய் மிகுந்த மனவேதனையும், வருத்தமும் அடைந்துள்ளதாக மாநில அமைச்சர் குமார் தெரிவித்துள்ளார்.
தமிழகத்தையே உலுக்கியுள்ள இச்சம்பவத்தில் பாதிக்கப்பட்ட சிறுமியின் பெற்றோர் மற்றும் குடும்பத்தினரை, முதலமைச்சர் விஜய்யின் உத்தரவின் பேரில் அமைச்சர் குமார் இன்று நேரில் சந்தித்து அரசின் சார்பில் ஆறுதல் கூறினார். மேலும், முதலமைச்சர் அறிவித்த நிதியுதவியையும் குடும்பத்தினரிடம் அவர் முறைப்படி ஒப்படைத்தார்.
பாதிக்கப்பட்ட குடும்பத்தினரைச் சந்தித்த பின் செய்தியாளர்களிடம் பேசிய அமைச்சர் குமார் கூறியதாவது:
“கும்மிடிப்பூண்டியில் ஒரு பச்சிளம் குழந்தைக்கு நேர்ந்துள்ள இந்தத் துயரச் சம்பவத்தைக் கேள்விப்பட்ட உடனே முதலமைச்சர் விஜய் அவர்கள் சொல்லொண்ணாத் துயரமும், வருத்தமும் அடைந்தார். இந்த விவகாரத்தில் குற்றவாளிகள் யாராக இருந்தாலும் அவர்களுக்குச் சட்டப்படி கடுமையான தண்டைனையைப் பெற்றுத்தர வேண்டும் என்பதில் முதலமைச்சர் மிகத் தீவிரமாக இருக்கிறார். காவல்துறையினர் இந்த வழக்கை மிகத் துரிதமாக விசாரித்து வருகின்றனர்.”
மேலும், “பாதிக்கப்பட்ட குடும்பத்திற்கு அரசு எப்போதும் உறுதுணையாக இருக்கும். இந்த வழக்கில் கைதான குற்றவாளிகள் மீது குண்டர் சட்டத்தின் கீழ் கடுமையான நடவடிக்கை எடுக்கப்பட்டு, நீதிமன்றத்தில் விரைவாக விசாரணை நடத்தி உரியத் தண்டனை பெற்றுத்தரப்படும்” என்றும் அமைச்சர் குமார் உறுதியளித்தார்.
இச்சம்பவம் தொடர்பாகக் காவல்துறை தரப்பில் வெளியான புதிய தகவலில், இந்த வழக்கில் தீவிர விசாரணை நடைபெற்று வருவதாகவும், வதந்திகளைப் பொதுமக்கள் நம்ப வேண்டாம் என்றும் கேட்டுக்கொள்ளப்பட்டுள்ளது. தமிழகத்தில் சட்டம் ஒழுங்கு மற்றும் பெண்களுக்கு எதிரான குற்றங்கள் குறித்து எதிர்க்கட்சிகள் கடுமையான விமர்சனங்களை முன்வைத்து வரும் சூழலில், அரசின் சார்பில் அமைச்சர் நேரில் சென்று ஆறுதல் கூறியிருப்பது அரசியல் வட்டாரத்தில் முக்கியத்துவம் வாய்ந்ததாகப் பார்க்கப்படுகிறது.
