பேங்காக்: தாய்லாந்து நாட்டில் ஏற்பட்டுள்ள கடுமையான வறட்சி காரணமாக, அங்குள்ள ஒரு முக்கிய அணையின் நீர்மட்டம் பெருமளவு குறைந்துள்ளது. இதன் விளைவாக, கடந்த 42 ஆண்டுகளுக்கும் மேலாகத் தண்ணீருக்கு அடியில் மூழ்கியிருந்த, இரண்டாம் உலகப் போர்க் காலத்து வரலாற்றுச் சுவடான ‘சயாம் மரண ரயில் பாதை’ (Siam Death Railway) மீண்டும் தரைமட்டத்தில் வெளியே தெரிந்துள்ள அதிசய சம்பவம் உலகளவில் வரலாற்று ஆய்வாளர்களின் கவனத்தை ஈர்த்துள்ளது.
தாய்லாந்து மற்றும் மியான்மர் (முன்னாள் பர்மா) நாடுகளை இணைக்கும் வகையில், இரண்டாம் உலகப் போரின் போது (1942-1943) ஜப்பானிய ராணுவத்தால் இந்த ரயில் பாதை அமைக்கப்பட்டது. சுமார் 415 கிலோமீட்டர் நீளம் கொண்ட இந்த ரயில் பாதையைக் கட்டும் பணியில், ஆசிய நாடுகளைச் சேர்ந்த 2 லட்சத்திற்கும் மேற்பட்ட தொழிலாளர்களும், 60 ஆயிரத்திற்கும் மேற்பட்ட போர்க் கைதிகளும் கட்டாயமாக ஈடுபடுத்தப்பட்டனர்.
‘மரண ரயில் பாதை’ என அழைக்கப்படக் காரணம் என்ன? அடர்ந்த காடுகள், செங்குத்தான மலைகள் மற்றும் கணிக்க முடியாத நதிகள் பாயும் கடினமான நிலப்பரப்பில், எவ்வித நவீன உபகரணங்களும் இன்றி மனித உழைப்பை மட்டுமே கொண்டு இப்பாதை உருவாக்கப்பட்டது. ஜப்பானிய ராணுவத்தின் கொடூரமான சித்திரவதைகள், போதிய உணவின்மை, கடுமையான வேலைப்பளு மற்றும் காலரா, மலேரியா போன்ற கொடிய நோய்களால், இப்பாதையை அமைக்கும் பணியில் ஈடுபட்ட சுமார் 1 லட்சத்திற்கும் மேற்பட்ட இந்தியர்கள், தமிழர்கள், மலேசியர்கள் மற்றும் ஐரோப்பிய போர்க் கைதிகள் பரிதாபமாக உயிரிழந்தனர்.
“ஒவ்வொரு ரயில் தண்டவாளக் கட்டையின் அடியிலும் ஒரு மனித உயிர் பலியாகியுள்ளது” என்று கூறும் அளவுக்கு இங்கு மரணங்கள் நிகழ்ந்ததால், இது ‘மரண ரயில் பாதை’ என்று அழைக்கப்படுகிறது. இதில் உயிரிழந்தவர்களில் பெரும்பாலோர் பிரிட்டிஷ் மலாயாவிலிருந்து கொண்டு செல்லப்பட்ட தமிழ் வம்சாவளித் தொழிலாளர்கள் என்பது குறிப்பிடத்தக்கது.
42 ஆண்டுகளுக்குப் பின் வெளிப்பட்ட சுவடுகள்: இரண்டாம் உலகப் போரின் முடிவுக்குப் பின், இப்பாதையின் பெரும்பகுதி கைவிடப்பட்டது. தொடர்ந்து 1980-களில் தாய்லாந்து அரசு இப்பகுதியில் ஒரு பெரிய அணையைக் கட்டியதால், இந்த ரயில் பாதையின் முக்கிய பாலங்கள் மற்றும் சுவடுகள் தண்ணீருக்கு அடியில் முழுமையாக மூழ்கின.
தற்போது 42 ஆண்டுகளுக்குப் பிறகு, வறட்சியின் காரணமாக அணை வற்றியதால், அந்த வரலாற்றுப் பாலத்தின் தூண்களும், தண்டவாளத்தின் எச்சங்களும் மீண்டும் வெளியே தெரிந்துள்ளன. இந்தத் தகவல் பரவியதை அடுத்து, தங்களது முன்னோர்களின் நினைவிடமாக இதைக் கருதும் நூற்றுக்கணக்கான உள்ளூர் மக்களும், சர்வதேச சுற்றுலாப் பயணிகளும், வரலாற்று ஆய்வாளர்களும் இந்த இடத்திற்குப் படையெடுத்து வருகின்றனர். தண்ணீருக்கு அடியில் இருந்து மீண்டும் வெளிவந்துள்ள இந்தச் சுவடுகள், அன்று மனித இனம் சந்தித்த பெருந்துயரத்தின் மௌன சாட்சியாக நிமிர்ந்து நிற்கின்றன.
