“ஜிம்னாஸ்ட் எனச் சொன்னால் எனக்குப் பெருமைதான்” – தனிப்பட்ட விமர்சனத்திற்கு குஷ்பு பதிலடி!
மதுரை மத்திய தொகுதியில் திமுக வேட்பாளர் பி.டி.ஆர். பழனிவேல் தியாகராஜன் மற்றும் புதிய நீதிக் கட்சி (அதிமுக கூட்டணி) வேட்பாளர் சுந்தர்.சி ஆகியோருக்கு இடையே முற்றியுள்ள வார்த்தைப் போர், தற்போது சமூக வலைதளங்களில் விவாதமாகியுள்ளது.
மோதலின் பின்னணி:
சமீபத்தில் ஒரு பரப்புரையில் பேசிய பி.டி.ஆர், சுந்தர்.சி-யின் கல்வித்தகுதி மற்றும் புரிதல் குறித்து விமர்சித்ததோடு, அவரது மனைவி குஷ்பு கட்சிகளைத் தாவுவதில் ஜிம்னாஸ்டிக் வீராங்கனையை விட வேகமானவர் எனச் சாடியிருந்தார்.
குஷ்புவின் காரசாரமான பதில்:
தனது எக்ஸ் (X) தளத்தில் பி.டி.ஆர்-க்கு பதிலளித்துள்ள குஷ்பு, பல்வேறு முக்கியக் கேள்விகளை முன்வைத்துள்ளார்:
- பதவி இறக்கம் குறித்து: “அந்த 30 ஆயிரம் கோடி ரூபாய் தொடர்பான வீடியோ வெளியான பிறகு, நீங்கள் ஏன் நிதி அமைச்சர் பதவியில் இருந்து ஐடி அமைச்சராகப் பதவி இறக்கப்பட்டீர்கள் என்பதை நாட்டு மக்களுக்கு முதலில் விளக்குங்கள்” எனச் சவால் விடுத்துள்ளார்.
- கட்சி மாற்றம்: “நான் சுயமரியாதை மற்றும் கண்ணியத்திற்காகவே கட்சி மாறினேன். உங்கள் கட்சியில் பாதி பேர் மாற்றுக் கட்சியில் இருந்து வந்தவர்கள்தான், அவர்களைப் பார்த்து ‘ஜிம்னாஸ்ட்’ எனச் சொல்லத் துணிச்சல் உண்டா?” என கேள்வி எழுப்பியுள்ளார்.
- கல்வி vs மரியாதை: “நாங்கள் பட்டதாரிகள் அல்ல என்றாலும், மற்றவர்களை மதிக்கத் தெரிந்தவர்கள். உங்கள் அதிகார மிரட்டலும், ஆணவப் பேச்சும் தோல்வி பயத்தின் வெளிப்பாடு” என விமர்சித்துள்ளார்.
- தொகுதி வளர்ச்சி: தொகுதிக்குச் செய்ய நினைத்ததைச் செய்ய முடியாமல் பி.டி.ஆரின் கைகள் கட்டப்பட்டிருந்ததாக அவரே ஒப்புக்கொண்டதைச் சுட்டிக்காட்டி, அதிகாரத்திற்காக மக்களின் பிரச்சினைகளைப் புறக்கணித்துவிட்டதாகக் குற்றம் சாட்டியுள்ளார்.
