அமெரிக்காவில் கௌதம் அதானி மீதான குற்றச்சாட்டுகள் முழுமையாகத் வாபஸ்: பல நூறு கோடி நிதிச் சமரசம் மூலம் வழக்குகள் முடிவுக்கு வந்தன!

புதுடெல்லி / நியூயார்க்: இந்தியாவின் முன்னணி தொழிலதிபர் கௌதம் அதானி மற்றும் அவரது உறவினர் சாகர் அதானி ஆகியோர் மீது அமெரிக்காவில் சுமத்தப்பட்டிருந்த லஞ்ச ஒழிப்பு மற்றும் நிதி மோசடி தொடர்பான அனைத்து குற்றவியல் வழக்குகளையும் (Criminal Charges) அமெரிக்க நீதித்துறை (DoJ) அதிகாரப்பூர்வமாகத் திரும்பப் பெற்றுள்ளது.

வழக்குகள் “With Prejudice” என்ற அடிப்படையில் தள்ளுபடி செய்யப்பட்டுள்ளதால், இந்த விவகாரத்தை மீண்டும் அமெரிக்க அரசால் ஓப்பன் செய்ய முடியாது; வழக்கு முற்றிலும் முடிவுக்கு வந்துள்ளது. சர்வதேச அளவில் பெரும் பரபரப்பை ஏற்படுத்தியிருந்த இப்பிரச்னையை முடிக்க அதானி குழுமம் மேற்கொண்ட அதிரடி உத்திகள் மற்றும் நிதிச் சமரசங்கள் குறித்த விபரங்கள் வெளியாகியுள்ளன.

1. அமெரிக்க முதலீட்டு உத்தியும், டொனால்ட் ட்ரம்பின் வழக்கறிஞரும்:

அதானி குழுமம் இந்தச் சட்டச் சிக்கலில் இருந்து விடுபட மிக வலுவான சட்ட மற்றும் பொருளாதார உத்திகளைக் கையாண்டதாகத் தெரிகிறது.

• முன்னணி வழக்கறிஞர் நியமனம்: அதானி இந்த வழக்கை எதிர்கொள்ள அமெரிக்காவின் அதிபர் டொனால்ட் ட்ரம்பின் தனிப்பட்ட வழக்கறிஞரான ராபர்ட் ஜே. கியூஃப்ரா (Robert J Giuffra Jr) என்பவரைத் தனது தலைமை வழக்கறிஞராக நியமித்தார்.
• 10 பில்லியன் டாலர் முதலீட்டு உறுதிமொழி: அமெரிக்க நீதித்துறை அதிகாரிகளுடன் நடந்த பேச்சுவார்த்தையில், அமெரிக்கப் பொருளாதாரத்தில் 10 பில்லியன் டாலர் (சுமார் ₹83,000 கோடி) முதலீடு செய்யவும், அதன் மூலம் 15,000 புதிய வேலைவாய்ப்புகளை உருவாக்கவும் அதானி தரப்பு ஒப்புக்கொண்டுள்ளதாகத் தகவல் வெளியாகியுள்ளது.
• எல்லை வரம்பு சவால்: இந்த விவகாரம் முற்றிலும் இந்தியாவில் நடந்தது என்றும், இதற்கு அமெரிக்க சட்டங்களின் கீழ் நடவடிக்கை எடுக்கப் போதிய எல்லை வரம்போ (Jurisdiction) அல்லது ஆதாரங்களோ இல்லை என்றும் நீதிமன்றத்தில் வாதிடப்பட்டது.

2. அதானி குழுமம் செய்துகொண்ட முக்கிய நிதிச் சமரசங்கள்:

குற்றவியல் வழக்குகள் தள்ளுபடி செய்யப்பட்டாலும், இந்த விவகாரத்தை முழுமையாக முடிக்க அமெரிக்காவின் பல்வேறு அமைப்புகளுடன் அதானி குழுமம் சில நிதி உடன்படிக்கைகளைச் செய்து கொண்டுள்ளது:

• அமெரிக்க செக்யூரிட்டீஸ் எக்ஸ்சேஞ்ச் (SEC) அபராதம்: இந்தியாவில் சூரிய ஒளி மின்சார ஒப்பந்தங்களைப் பெற லஞ்சம் கொடுக்க முயன்றதாக எழுந்த சிவில் வழக்கை (Civil Case) முடிக்க கௌதம் அதானி மற்றும் சாகர் அதானி ஆகிய இருவரும் சேர்ந்து $18 மில்லியன் (சுமார் ₹150 கோடி) தொகையை அமெரிக்காவிற்கு அபராதமாகச் செலுத்தச் சம்மதித்துள்ளனர்.
• ஈரான் எரிவாயு விவகாரச் சமரசம்: அமெரிக்காவின் வர்த்தகத் தடைகளை மீறி துபாய் சப்ளையர் மூலம் ஈரானில் இருந்து எல்பிஜி (LPG) எரிவாயு இறக்குமதி செய்யப்பட்டதாக எழுந்த மற்றொரு வழக்கைச் சமரசம் செய்ய, அதானி குழுமம் $275 மில்லியன் (சுமார் ₹2,300 கோடி) தொகையை அமெரிக்கக் கருவூலத்திற்கு அபராதமாகச் செலுத்த உடன்படிக்கை செய்துள்ளது.

பங்குச்சந்தை நிபுணர்கள் கருத்து: இந்த மெகா சமரசங்கள் மற்றும் பல நூறு கோடி ரூபாய் அபராதங்கள் மூலம் அதானி குழுமம் மீதான அனைத்து அமெரிக்க சட்டச் சிக்கல்களும் முழுமையாக நீங்கியுள்ளன. இதன் மூலம் சர்வதேசப் பங்குச் சந்தைகளில் மீண்டும் அதானி குழுமத்தின் பங்குகள் வலுவடையவும், உலகளாவிய முதலீடுகளைத் தடையின்றித் திரட்டவும் வழிவகை செய்யப்பட்டுள்ளது.