புதுடெல்லி:
மத்திய மற்றும் மாநில அரசுகளின் சுமார் 2,400-க்கும் மேற்பட்ட சேவைகளை ஒரே இடத்தில் வழங்கும் இந்தியாவின் முதன்மை செயலியான ‘உமாங்’ (UMANG) தளத்தின் பாதுகாப்பு கட்டமைப்பில் மிகப்பெரிய விரிசல் ஏற்பட்டுள்ளதாகச் பாதுகாப்பு ஆராய்ச்சியாளர்கள் எச்சரித்துள்ளனர்.
ஆராய்ச்சியாளர்கள் கண்டறிந்த அதிர்ச்சி உண்மைகள்:
சைபர் பாதுகாப்பு ஆராய்ச்சியாளர்களான அக்ஷய் சி.எஸ். (Akshay C.S.) மற்றும் வைரல் வகேலா (Viral Vaghela) ஆகியோர் இந்த அதிர்ச்சியூட்டும் குறைபாடுகளைக் கண்டறிந்துள்ளனர். அவர்களின் கூற்றுப்படி:
“உமாங் தளத்தின் ஒட்டுமொத்த பாதுகாப்பு வடிவமைப்பிலேயே (Architecture) அடிப்படைத் தவறுகள் உள்ளன. இது ஏதோ ஒரு குறிப்பிட்ட சேவையில் ஏற்பட்ட கோளாறு அல்ல; மாறாக, தளத்தின் வடிவமைப்பு முறையிலேயே ‘API’ (Application Programming Interface) வழியாகப் பயனர்களின் தரவுகள் எளிதாக அணுகும் வகையில் திறந்த நிலையில் இருந்துள்ளன.”
என்னென்ன தகவல்கள் கசிந்துள்ளன?
- ஆதார் எண்கள் (Aadhaar Numbers): ஆதார் சட்டம் 2016-ன் படி ஆதார் எண்களைப் பாதுகாப்பற்ற முறையில் சேமிக்கக் கூடாது என்ற விதிமுறை உள்ளது. ஆனால், உமாங் தளத்தில் பல சேவைகளில் பயனர்களின் ஆதார் எண்கள் எவ்வித பாதுகாப்பும் இன்றி எளிய உரைவடிவில் (Plaintext) சேமிக்கப்பட்டிருந்தது கண்டறியப்பட்டுள்ளது.
- EPFO கணக்கு விவரங்கள் (UAN): உமாங் செயலியில் அதிகம் பயன்படுத்தப்படும் ‘வருங்கால வைப்பு நிதி’ (EPFO) பிரிவில் உள்ள பயனர்களின் யுஏஎன் (UAN) எண்கள் கசிந்துள்ளன.
- மற்ற விவரங்கள்: பயனர்களின் பான் கார்டு (PAN) விவரங்கள், எல்பிஜி (LPG) சிலிண்டர் முன்பதிவு விவரங்கள் மற்றும் தனிப்பட்ட முகவரிகள் ஆகியவையும் இதில் அடங்கும்.
ஏற்படக்கூடிய ஆபத்துகள் என்ன?
தரவு பாதுகாப்பு நிபுணர்களின் கூற்றுப்படி, இந்தத் தரவுகளைக் கொண்டு இணையக் குற்றவாளிகள் பயனர்களின் கணக்குகளை முடக்கவோ அல்லது மோசடி செய்யவோ வாய்ப்புள்ளது.
குறிப்பாக, EPFO பயனர்களின் UAN எண்களைப் பயன்படுத்தி, வங்கி கணக்கு விவரங்களை மாற்றி முறைகேடாகப் பணத்தை எடுக்கக்கூடிய (Siphon funds) அபாயகரமான சூழல் நிலவியதாக அவர்கள் எச்சரித்துள்ளனர்.
அரசின் தரப்பு விளக்கம் என்ன?
இக்குறைபாடுகள் குறித்துத் தகவல் தொழில்நுட்ப அமைச்சகம் (MeitY) மற்றும் இந்தியாவின் அவசரக்கால கணினிப் பாதுகாப்புப் பிரிவு (CERT-In) ஆகியவற்றுக்கு ஆராய்ச்சியாளர்கள் உடனடியாகத் தகவல் அளித்துள்ளனர்.
இதனைத் தொடர்ந்து மத்திய அரசு வெளியிட்டுள்ள விளக்கத்தில்:
- பாதிக்கப்பட்ட அனைத்து ‘API’-களிலும் இருந்த விவரங்கள் தற்போது குறியீட்டு முறையின்கீழ் (Encrypted) மாற்றப்பட்டுப் பாதுகாப்பற்ற நிலை சரிசெய்யப்பட்டுள்ளது.
- கடந்த மூன்று மாத கால பரிவர்த்தனைகள் அனைத்தும் ஆய்வு செய்யப்பட்டுள்ளன.
- இதுவரை எவ்வித அசாதாரணமான செயல்பாடுகளோ அல்லது முறைகேடுகளோ கண்டறியப்படவில்லை; தளம் தொடர்ந்து கண்காணிக்கப்பட்டு வருகிறது என்று அரசு தரப்பில் தெரிவிக்கப்பட்டுள்ளது.
