சென்னை: சட்டமன்ற அதிமுக-விற்குள் நிலவி வரும் கொறடா (Whip) மற்றும் எம்.எல்.ஏ-க்கள் ஆதரவு விவகாரம் தொடர்பாக, சட்டப்பேரவை விதிகளின்படி உரிய முடிவு எடுக்கப்படும் என்று தமிழ்நாடு சட்டப்பேரவை சபாநாயகர் ஜே.சி.டி. பிரபாகர் தெரிவித்துள்ளார்.
இபிஎஸ் – சிவிஎஸ் தரப்பு போட்டி மனுக்கள்:
அதிமுக சட்டமன்ற உறுப்பினர்களின் பலம் 44 ஆகக் குறைந்து, கட்சிக்குள் எடப்பாடி பழனிசாமி (EPS) மற்றும் சி.வி.சண்முகம் (CVS) என இரு பிரிவுகளாகப் பிளவு ஏற்பட்டுள்ள சூழலில், இரு தரப்பிலிருந்தும் சபாநாயகரிடம் மனுக்கள் அளிக்கப்பட்டுள்ளன.
தங்களுக்குத் தான் அதிக எம்.எல்.ஏ-க்களின் ஆதரவு இருக்கிறது என்றும், தங்களது தரப்பு கொறடா உத்தரவுகளையே ஏற்றுக்கொள்ள வேண்டும் என்றும் இரு தரப்பும் பேரவைத் தலைவரிடம் முறையிட்டுள்ளன.
சபாநாயகர் விளக்கம்:
இதுகுறித்து சென்னை தலைமைச் செயலகத்தில் செய்தியாளர்களைச் சந்தித்த சபாநாயகர் ஜே.சி.டி. பிரபாகர் கூறியதாவது:
“அதிமுக கொறடா விவகாரம் தொடர்பாக எடப்பாடி பழனிசாமி தரப்பில் இருந்தும், சி.வி.சண்முகம் தரப்பில் இருந்தும் மனுக்கள் அளிக்கப்பட்டுள்ளன. இந்த இரண்டு தரப்பு மனுக்களும் தற்போது எனது தீவிரப் பரிசீலனையில் உள்ளன. சட்டமன்ற விதிகளின்படியும், சட்ட வல்லுநர்களின் ஆலோசனையின்படியும் இந்த விவகாரத்தில் முறையான முடிவு விரைவில் எடுக்கப்படும்.”
ஏன் இந்த கொறடா பதவி முக்கியம்?:
சட்டமன்றத்தில் ஒரு கட்சியின் எம்.எல்.ஏ-க்கள் அனைவரும் எந்த அடிப்படையில் வாக்களிக்க வேண்டும், அவைக்கு எப்போது வர வேண்டும் என்பதை உத்தரவிடும் அதிகாரம் ‘கொறடா’-வுக்கு (Whip) மட்டுமே உண்டு. கொறடாவின் உத்தரவை மீறும் எம்.எல்.ஏ-க்கள் மீது கட்சித் தாவல் தடைச் சட்டத்தின் கீழ் நடவடிக்கை எடுக்க முடியும்.
தற்போது இபிஎஸ் வசம் 27 எம்.எல்.ஏ-க்களும், சிவிஎஸ் வசம் 17 எம்.எல்.ஏ-க்களும் இருப்பதால், சபாநாயகர் யாருடைய கொறடாவை அங்கீகரிக்கப் போகிறார் என்பதைப் பொறுத்தே சட்டமன்றத்தில் அதிமுக-வின் எதிர்காலம் அமையும் என்பதால் இந்த விவகாரம் பெரும் எதிர்பார்ப்பை ஏற்படுத்தியுள்ளது.
