சாத்தூர்: பாஜக-வுக்கு ‘அக்னி பரீட்சை’! நயினார் நாகேந்திரன் கோட்டையைக் கைப்பற்றுவாரா?

வரலாற்றை மாற்றுமா தாமரை? – சவாலாக மாறும் திமுக-வின் ‘கடற்கரை ராஜ்’ மற்றும் சசிகலா ஃபேக்டர்!

விருதுநகர் மாவட்டத்தின் ‘தீப்பெட்டி நகரம்’ என்று அழைக்கப்படும் சாத்தூர் தொகுதி, இந்த முறை தமிழகமே உற்றுநோக்கும் விஐபி தொகுதியாக மாறியுள்ளது. நெல்லையை விட்டுவிட்டு சாத்தூரைத் தேர்வு செய்துள்ள நயினார் நாகேந்திரனுக்குப் பல சாதக, பாதகங்கள் அணிவகுக்கின்றன.

சாத்தூர் தேர்தல் வரலாறு: யார் ஆதிக்கம்?

1952 முதல் 2021 வரை நடைபெற்ற 17 தேர்தல்களில், சாத்தூர் தொகுதியில் பாஜக ஒருமுறை கூட வென்றதில்லை.

• அதிமுக: 6 முறை (அதிகபட்ச வெற்றி)
• திமுக: 5 முறை
• காங்கிரஸ்: 3 முறை (பெருந்தலைவர் காமராஜர் இங்கிருந்து இருமுறை வென்றுள்ளார்)
• சுதந்திரா கட்சி, பார்வர்டு பிளாக், மதிமுக: தலா 1 முறை

நயினார் நாகேந்திரன் எதிர்கொள்ளும் 3 முக்கிய சவால்கள்:

1. திமுக-வின் பலமான வேட்பாளர்: திமுக சார்பில் நிறுத்தப்பட்டுள்ள கடற்கரை ராஜ், அப்பகுதியில் நீண்ட கால அரசியல் அனுபவம் கொண்டவர். குறிப்பாக, அமைச்சர் கே.கே.எஸ்.எஸ்.ஆர். ராமச்சந்திரனின் தீவிர ஆதரவாளரான இவர், தொகுதியின் ஒவ்வொரு வார்டிலும் செல்வாக்குக் கொண்டவர். சமீபத்தில் இவரது வீட்டில் நடைபெற்ற திருட்டுச் சம்பவம் ஒருபுறம் பரபரப்பை ஏற்படுத்தினாலும், திமுக-வின் வாக்கு வங்கி இவருக்குப் பெரும் பலமாக உள்ளது.

2. சசிகலா மற்றும் ‘முக்குலத்தோர்’ வாக்குகள்: சாத்தூரில் சுமார் 27% முக்குலத்தோர் வாக்குகள் உள்ளன. இதை நம்பியே நயினார் இங்கு களம் காண்கிறார். ஆனால், சசிகலாவின் அனைத்திந்திய புரட்சித் தலைவர் மக்கள் முன்னேற்றக் கழகம் சார்பில் இசக்கி ராஜா தேவர் களமிறக்கப்பட்டிருப்பது நயினாருக்குப் பின்னடைவாகப் பார்க்கப்படுகிறது. சசிகலாவின் ஆதரவாளர் வாக்குகளைப் பிரித்தால், அது நயினார் நாகேந்திரனின் வெற்றி வாய்ப்பைப் பாதிக்கும்.

3. கூட்டணிக் குழப்பம் மற்றும் மேலிட அதிருப்தி: அண்ணாமலைக்கு மாற்றாக நயினார் நாகேந்திரன் தலைவரானதில் பாஜக-வின் ஒரு தரப்பினர் அதிருப்தியில் இருப்பதாகக் கூறப்படுகிறது. மேலும், பிரதமர் மோடி மற்றும் மத்திய அமைச்சர்களின் பிரச்சாரம் இந்த முறை தமிழகத்தில் எதிர்பார்த்த அளவு இல்லாதது, நயினார் நாகேந்திரனை ஒரு ‘தனிப் போராளியாக’ மாற்றியுள்ளது.

சாதகமான அம்சம் என்ன?

சாத்தூரில் அதிக முறை வென்ற அதிமுக, தற்போது பாஜக-வுடன் கூட்டணியில் இருப்பது நயினாருக்கு இருக்கும் ஒரே பெரிய பிளஸ் பாயிண்ட். அதிமுக-வின் பாரம்பரிய வாக்குகள் முழுமையாக பாஜக-வுக்கு விழுந்தால் மட்டுமே நயினாரால் வரலாற்றை மாற்ற முடியும்.