ஜெய்ப்பூர்: ஐபிஎல் தொடரில் ராஜஸ்தான் ராயல்ஸ் (RR) அணியால் ஏலத்தில் எடுக்கப்பட்டு, ஒட்டுமொத்த கிரிக்கெட் உலகின் கவனத்தையும் ஈர்த்துள்ள இளம் இடதுகை பேட்ஸ்மேன் வைபவ் சூர்யவன்ஷி, தனது பேட்டிங் அணுகுமுறை மற்றும் ஆட்டத்திறன் குறித்து வெளிப்படையாகப் பேசியுள்ளார்.
மிகக் குறைந்த வயதிலேயே சீனியர் கிரிக்கெட்டில் தடம் பதித்து சாதனை படைத்து வரும் சூர்யவன்ஷி, களத்தில் தனது மனநிலை எப்படி இருக்கும் என்பதைப் பகிர்ந்துள்ளார்.
வைபவ் சூர்யவன்ஷி பேசியதாவது:
“விளையாடும்போது எனக்கு ஏதோ ஒரு இடத்தில் சிக்கல் இருக்கிறது என்று தோன்றினால், அதை உடனடியாகச் சரி செய்ய நான் முயற்சிப்பேன். மைதானத்தில் நமக்கு எதிரில் யார் விளையாடுகிறார்கள், எந்த உலகத்தரம் வாய்ந்த பந்துவீச்சாளர் பந்து வீசுகிறார் என்பது எனக்கு முக்கியமில்லை.
அது அவர்களின் திட்டம், அதை அவர்கள் செயல்படுத்துவார்கள். ஆனால், நான் என்னுடைய திட்டத்தில் மட்டுமே முழு கவனம் செலுத்துவேன். தேவையில்லாத அழுத்தங்களை வளர்த்துக் கொள்ளாமல், களத்தில் எப்போதும் போல் என்னுடைய சாதாரண கிரிக்கெட்டை விளையாடுவேன்.”
இவ்வாறு வைபவ் சூர்யவன்ஷி மிகவும் முதிர்ச்சியுடன் தெரிவித்துள்ளார்.
மிக இளம் வயதிலேயே ஐபிஎல் ஏலத்தில் கோடிகளை வென்று, அழுத்தங்கள் நிறைந்த தொடரில் கால் பதித்துள்ள நிலையிலும், எதிரணியின் வியூகங்களைப் பற்றி கவலைப்படாமல் தனது எதார்த்தமான ஆட்டத்தை வெளிப்படுத்துவதில் அவர் காட்டும் தெளிவு, கிரிக்கெட் விமர்சகர்கள் மற்றும் ரசிகர்களிடையே பெரும் பாராட்டைப் பெற்று வருகிறது.
