புதுடெல்லி: கடந்த 2010-ம் ஆண்டு ஆகஸ்ட் 23-ம் தேதிக்கு முன்பு பணியில் சேர்ந்த அனைத்து ஆசிரியர்களுக்கும் ஆசிரியர் தகுதித் தேர்வில் (TET) இருந்து நிரந்தர விலக்கு அளிக்கக் கோரி, பிரதமர் நரேந்திர மோடிக்கும், மத்திய கல்வி அமைச்சர் தர்மேந்திர பிரதானுக்கும் கடிதம் அனுப்ப உள்ளதாகத் தேசிய அளவிலான ஆசிரியர் அமைப்பு தெரிவித்துள்ளது.
உச்ச நீதிமன்றத்தின் சமீபத்திய உத்தரவைத் தொடர்ந்து எழுந்துள்ள பணிப் பாதுகாப்பு குறித்த நிச்சயமற்ற தன்மையைப் போக்க, மத்திய அரசு உடனடியாகச் சட்டத் திருத்தம் கொண்டு வர வேண்டும் என்றும் அவ்வமைப்பு வலியுறுத்தியுள்ளது.
செய்தியின் விவரம்:
அகில பாரதிய ராஷ்ட்ரிய ஷைக்ஷிக் மகாசங்கம் (ABRSM) என்ற தேசிய அளவிலான ஆசிரியர் அமைப்பு வெளியிட்டுள்ள முக்கிய அறிக்கையில் குறிப்பிட்டிருப்பதாவது:
- 25 லட்சம் ஆசிரியர்கள் தவிப்பு: ஆசிரியர் தகுதித் தேர்வு தொடர்பான பல்வேறு மறுஆய்வு மனுக்களை உச்ச நீதிமன்றம் கடந்த மே 29-ம் தேதி தள்ளுபடி செய்து, டெட் தேர்ச்சி பெறுவதற்கான அவகாசத்தை 2028 ஆகஸ்ட் 31 வரை நீட்டித்து உத்தரவிட்டது. இதனால், நாடு முழுவதும் உள்ள சுமார் 25 லட்சத்திற்கும் மேற்பட்ட மூத்த ஆசிரியர்கள் கடுமையான பணி பாதுகாப்பற்ற சூழலையும், வேதனையையும் எதிர்கொண்டுள்ளனர்.
- அன்றைய விதிகளின்படி நியமனம்: தேசிய ஆசிரியர் கல்விக்குழு (NCTE) கடந்த 2010 ஆகஸ்ட் 23 அன்றுதான் டெட் தேர்வை குறைந்தபட்ச தகுதியாக அறிவித்தது. ஆனால், அதற்கு முன்பே பல்வேறு மாநிலங்களில் அப்போதைய கல்வி விதிகள் மற்றும் தகுதி அளவுகோல்களின் அடிப்படையில் இந்த ஆசிரியர்கள் தகுதியோடு, முறையாக நியமிக்கப்பட்டனர்.
- தேசிய அளவிலான முக்கியக் கோரிக்கைகள்: 1. 2010 ஆகஸ்ட் 23-க்கு முன்பு நியமிக்கப்பட்ட அனைத்து ஆசிரியர்களுக்கும் ‘டெட்’ தேர்வில் இருந்து நிரந்தர விலக்கு அளிக்க வேண்டும். 2. அவர்களின் பணி மூப்பு (Seniority), பதவி உயர்வு (Promotion) மற்றும் பணிகள் சார்ந்த இதர உரிமைகளுக்கு முழுப் பாதுகாப்பு வழங்க வேண்டும். 3. பாதிக்கப்பட்ட ஆசிரியர்களின் பணி நிலை குறித்த அச்சத்தை நீக்க, அனைத்து மாநிலங்கள் மற்றும் யூனியன் பிரதேசங்களுக்கு மத்திய அரசு தெளிவான வழிகாட்டுதல்களை வழங்க வேண்டும்.
சட்டத்திருத்தமே நிரந்தர தீர்வு: நீதிமன்றங்களின் தீர்ப்பை மதிப்பதாகத் தெரிவித்துள்ள ஆசிரியர் அமைப்பு, நீதிமன்றங்கள் சட்டத்தை விளக்குகின்றன என்றாலும், பொதுமக்களின் மற்றும் ஆசிரியர்களின் நலன் கருதி நாடாளுமன்றத்தில் உரிய கொள்கை முடிவுகளையும் சட்டத் திருத்தங்களையும் கொண்டு வர மத்திய அரசுக்கு முழு அதிகாரம் உள்ளது என்பதைச் சுட்டிக்காட்டியுள்ளது.
