போபால்:
மத்தியப் பிரதேசத்தில் பொது சிவில் சட்ட (UCC) மசோதா வரைவுக்கு மாநில அமைச்சரவை முறைப்படி ஒப்புதல் அளித்துள்ளது. முதலமைச்சர் மோகன் யாதவ் தலைமையில் நடைபெற்ற சிறப்பு அமைச்சரவைக் கூட்டத்தில் இந்த வரலாற்றுச் சிறப்புமிக்க முடிவு எடுக்கப்பட்டது.
திருமணமானவர் ‘லிவ்-இன்’ உறவில் ஈடுபட்டால் சிறை
இந்த மசோதாவில் ‘லிவ்-இன்’ (Live-in) உறவுகள் குறித்தும், திருமணச் சட்டங்கள் குறித்தும் பல்வேறு கடுமையான விதிகளும் சீர்திருத்தங்களும் முன்மொழியப்பட்டுள்ளன:
- 5 ஆண்டுகள் வரை சிறை: ஏற்கனவே திருமணமாகி, கணவன் அல்லது மனைவி உயிருடன் இருக்கும்போது மற்றொரு நபருடன் ‘லிவ்-இன்’ உறவில் ஈடுபட்டால், அவர்களுக்கு 5 ஆண்டுகள் வரை சிறைத்தண்டனை விதிக்க மசோதா வழிவகை செய்கிறது.
- கட்டாயப் பதிவு: ‘லிவ்-இன்’ உறவில் வாழத் தொடங்கும் தம்பதியர் 1 மாதத்திற்குள் தங்களைப் பதிவு அதிகாரியிடம் பதிவு செய்ய வேண்டும். தவறினால் சிறைத்தண்டனை மற்றும் அபராதம் விதிக்கப்படும்.
- பெண்களுக்கு ஜீவனாம்சம்: ‘லிவ்-இன்’ உறவில் இருக்கும் பெண் கைவிடப்பட்டால், சட்டப்பூர்வ மனைவியைப் போலவே அவருக்கும் ஜீவனாம்சம் (Maintenance) பெற உரிமை உண்டு.
- குழந்தைகளின் உரிமை: இத்தகைய உறவின் மூலம் பிறக்கும் குழந்தைகளுக்குச் சொத்தில் முழு உரிமையும், சட்டப்பூர்வ அங்கீகாரமும் வழங்கப்படும்.
பன்மண முறை மற்றும் முத்தலாக் தடை
பொது சிவில் சட்ட மசோதாவின் கீழ் பலதார மணம் (Polygamy), முத்தலாக் மற்றும் ‘நிகா ஹலாலா’ போன்ற நடைமுறைகள் முற்றிலுமாகத் தடை செய்யப்பட்டு, குற்றவியல் தண்டனைக்குரிய குற்றங்களாக மாற்றப்பட்டுள்ளன. மேலும், சொத்து உரிமையில் ஆண்-பெண் இருபாலருக்கும் சம உரிமை வழங்கப்பட்டுள்ளது.
பழங்குடியினருக்கு விலக்கு
மத்தியப் பிரதேசத்தில் வாழும் பட்டியல் பழங்குடியினர் (Scheduled Tribes) மற்றும் பாதுகாக்கப்பட்ட பழங்குடியின சமூகங்களுக்கு இந்த பொது சிவில் சட்டத்தில் இருந்து விலக்கு அளிக்கப்பட்டுள்ளது.
இந்த மசோதா விரைவில் நடைபெறவுள்ள மாநில சட்டமன்றக் கூட்டத்தொடரில் தாக்கல் செய்யப்பட்டுச் சட்டமாக்கப்படும் என எதிர்பார்க்கப்படுகிறது.
