சென்னை: திரையுலகின் முன்னணி நட்சத்திரமான நடிகர் அஜித்குமாரின் தாயார் மோகினி மணி (79) காலமானதைத் தொடர்ந்து, அரசியல் தலைவர்கள் பலரும் தங்களது இரங்கலைத் தெரிவித்து வருகின்றனர். அந்த வகையில், பாஜக மூத்த தலைவர்களில் ஒருவரான நயினார் நாகேந்திரன் தனது ஆழ்ந்த இரங்கலைப் பதிவு செய்துள்ளார்.
நடிகர் அஜித்தின் தாயார் வயது மூப்பு மற்றும் உடல்நலக்குறைவு காரணமாக சென்னையில் உள்ள அவரது இல்லத்தில் இயற்கை எய்தினார். இந்தத் தகவல் வெளியானது முதல் திரையுலகினரும், அரசியல் பிரமுகர்களும் அஜித்தின் குடும்பத்தினருக்கு ஆறுதல் கூறி வருகின்றனர்.
நயினார் நாகேந்திரன் இரங்கல்: அஜித்குமாரின் தாயார் மறைவுக்கு இரங்கல் தெரிவித்துள்ள நயினார் நாகேந்திரன், “பிரபல திரைப்பட நடிகர் அஜித்குமார் அவர்களின் தாயார் திருமதி. மோகினி அவர்கள் மறைந்த செய்தி மிகுந்த வருத்தமளிக்கிறது. அன்புத் தாயாரை இழந்து வாடும் நடிகர் அஜித் அவர்களுக்கும், அவர்தம் குடும்பத்தினருக்கும், உறவினர்களுக்கும் எனது ஆழ்ந்த இரங்கலைத் தெரிவித்துக் கொள்கிறேன். அன்னாரது ஆன்மா சாந்தியடைய இறைவனைப் பிரார்த்திக்கிறேன்” என்று குறிப்பிட்டுள்ளார்.
தாயாரின் மறைவால் துயரத்தில் இருக்கும் நடிகர் அஜித்குமாருக்கு, அரசியல் வட்டாரங்கள் மற்றும் சமூக வலைத்தளங்கள் வாயிலாகத் தொடர்ந்து இரங்கல் செய்திகள் குவிந்து வருகின்றன.
